Сістэма апавяшчэння насельніцтва будзе правераная 10 сакавіка ў Брэсцкай вобласці

10 сакавіка, Позірк. У Брэсцкай вобласці 10 сакавіка пройдзе пятая ад пачатку года “планавая тэхнічная праверка” сістэмы апавяшчэння насельніцтва, вынікае з інфармацыі Міністэрства па надзвычайных сітуацыях.

У рамках праверкі, запланаванай на перыяд з 12:00 да 13:00, “будуць уключацца электрасірэны”. МНС традыцыйна заклікала грамадзян захоўваць спакой, нагадаўшы, што ніякіх дзеянняў рабіць не трэба.

Папярэднія праверкі ў рэгіёне, які мяжуе з Украінай і Польшчай, праводзіліся 13 і 27 студзеня, а таксама 10 і 24 лютага.

Праведзены “Позіркам” аналіз інфармацыі на рэсурсах МНС паказаў, што ў 2025 годзе сістэма апавяшчэння ў Брэсцкай вобласці правяралася не менш як 20 разоў, Гомельскай — 8, Мінскай — 4, Гродзенскай — 3 (адзін раз — у межах Лідскага раёна), Віцебскай — 2, Магілёўскай — 2 (адзін раз — толькі ў абласным цэнтры).

Летась 13 сакавіка планавая праверка сістэмы апавяшчэння прайшла па ўсёй Беларусі.

У Беларусі зафіксавана некалькі выпадкаў падзення дронаў на будынкі (у тым ліку ў Мінску), аднак інфармацыі пра тое, што пры гэтым актывавалася сістэма апавяшчэння, няма.

20 лютага 2026 года камандуючы ВПС і войскамі СПА Андрэй Лук’яновіч заявіў, што беларускія вайскоўцы рэгулярна выкарыстоўваюць авіяцыю і зенітныя ракетныя комплексы для знішчэння беспілотнікаў, якія залятаюць у Беларусь.

Ад пачатку поўнамаштабнай вайны РФ супраць Украіны праверкі сістэм апавяшчэння сістэматычна праходзяць, напрыклад, у Літве, Польшчы, Чэхіі. Для гэтага выкарыстоўваюцца рэпрадуктары на вуліцах, праз якія перадаецца паведамленне і гучыць сірэна.