Рассельгаснагляд не дазволіў беларусу даставіць у Мінск набытыя ў Маскве сухафрукты і арэхі

10 сакавіка, Позірк. Пра спыненне спробы несанкцыянаванага вывазу з Расіі ў Беларусь каля 4 тон сухафруктаў і арэхаў паведаміла 10 сакавіка Федэральная служба па ветэрынарным і фітасанітарным наглядзе (Рассельгаснагляд).

Груз перавозіўся 3 сакавіка на аўтамабілі пад кіраваннем грамадзяніна Беларусі, які ехаў у Мінск.

“У ходзе першаснага кантролю па наяўнай на тары маркіроўцы было ўстаноўлена, што прадукцыя мае паходжанне з краін блізкага і далёкага замежжа, адгружана ў маскоўскім аптовым прадуктовым цэнтры “Фуд Сіці” і не суправаджалася фітасанітарным сертыфікатам”, — адзначае Рассельгаснагляд.

Паведамляецца, што фітасанітарная экспертыза не выявіла ў адабраных узорах шкодных каранцінных арганізмаў, тым не менш далейшае перамяшчэнне грузу ў напрамку Беларусі было спынена. 6 сакавіка груз вернуты са Смаленскай вобласці ў Маскву.

Перавозчык прыцягнуты да адміністрацыйнай адказнасці.