Лукашэнка павіншаваў Такаева з “паспяховым правядзеннем агульнанацыянальнага рэферэндуму”

16 сакавіка, Позірк. Аляксандр Лукашэнка “ад імя беларускага народа і сябе асабіста” павіншаваў прэзідэнта Казахстана Касым-Жамарта Такаева з “паспяховым правядзеннем агульнанацыянальнага рэферэндуму”. Пра гэта паведамляе прэс-служба беларускага палітыка.

“Вынікі плебісцыту сталі чарговым пацвярджэннем высокага даверу грамадзян да праводзімага вамі курсу на мадэрнізацыю краіны і ўмацаванне дзяржаўнасці, наглядна прадэманстравалі згуртаванасць казахстанскага грамадства ў імкненні ствараць “Справядлівы Казахстан”, забяспечваць яго стабільнае развіццё”, — заявіў Лукашэнка.

Паводле яго слоў, рэалізацыя прынцыпаў, закладзеных у новую Канстытуцыю, “паслужыць надзейным падмуркам для далейшага росквіту Казахстана, умацавання яго ролі на міжнароднай арэне, росту дабрабыту грамадзян”.

“Мінск нязменна шануе адносіны стратэгічнага партнёрства і саюзніцтва з Астаной, — адзначыў віншавальнік. — Перакананы, наша шматграннае супрацоўніцтва, заснаванае на прынцыпах дружбы, даверу і ўзаемнай падтрымкі, будзе і надалей дынамічна пашырацца на карысць двух брацкіх народаў”.

Галасаванне на рэферэндуме ў Казахстане праходзіла 15 сакавіка. Паводле афіцыйных даных, папраўкі ў Канстытуцыю падтрымала больш за 87% удзельнікаў, яўка перавысіла 73%.

Участкі для галасавання працавалі ў Мінску і Брэсце пры дыпламатычных прадстаўніцтвах Казахстана.

Рэферэндум па змене Канстытуцыі ініцыяваны Такаевым.  Праект новай Канстытуцыі прадугледжвае яе маштабнае абнаўленне. Паводле ацэнак СМІ, змены закрануць каля 84–87% тэксту дакумента.

Сярод асноўных прапанаваных змяненняў — пераўтварэнне двухпалатнага парламента ў аднапалатны, скарачэнне паўнамоцтваў заканадаўчага органа, вяртанне пасады віцэ-прэзідэнта (скасаваная ў 1996 годзе) і інш.

Таксама прапануецца скарэктаваць статус рускай мовы. Цяпер у Канстытуцыі гаворыцца, што ў дзяржустановах руская мова выкарыстоўваецца “нароўні з казахскай”, у новай версіі асноўнага закона — што “разам з казахскай”.

За час свайго знаходжання ва ўладзе (з 1994 года) Лукашэнка не аднойчы ўносіў змены ў Канстытуцыю з дапамогай рэферэндуму. Шэраг паправак дэ-факта быў накіраваны на ўмацаванне яго асабістай улады і забеспячэнне бестэрміновага кіравання.