Мінфін: Вітаем дзеянні амерыканскага боку па зняцці санкцый

20 сакавіка, Позірк. Міністэрства фінансаў “вітае дз”еянні амерыканскага боку па зняцці раней дзейных абмежаванняў” у дачыненні да ведамства і “шэрагу беларускіх банкаў”.

Як адзначаецца ў заяве Мінфіна, такія крокі “ствараюць спрыяльныя перадумовы для аднаўлення даверу паміж удзельнікамі міжнароднага рынку капіталу”.

У ведамстве выступаюць супраць выкарыстання “любых нярынкавых механізмаў у міжнародных фінансах” і падтрымліваюць “развіццё супрацоўніцтва на прынцыпах узаемнай павагі, раўнапраўя і ўліку інтарэсаў усіх бакоў”, гаворыцца ў паведамленні.

Таксама Мінфін застаецца “адкрытым да дыялогу з партнёрамі, якія падзяляюць гэты падыход”.

Аб зняцці амерыканскіх санкцый з ААТ “Белінвестбанк”, ААТ “Банк развіцця Рэспублікі Беларусь” і Міністэрства фінансаў 19 сакавіка паведаміла прэс-служба Аляксандра Лукашэнкі па выніках яго сустрэчы з амерыканскай дэлегацыяй.

Згодна з актуальнай інфармацыяй на сайце Мінфіна ЗША, пад санкцыямі з дзейных цяпер банкаў Беларусі, акрамя двух згаданых, знаходзяцца ААТ “Банк БелВЭБ”, ААТ “Банк“ Дабрабыт”, ЗАТ “ТК Банк”, ААТ “Сбер Банк”  (фігуруе пад ранейшай назвай ААТ “БПС-Сбербанк”) і ЗАТ “Банк ВТБ (Беларусь)”.

Па выніках візіту ў Мінск амерыканскай дэлегацыі вызвалена 250 палітвязняў, з якіх 235 засталася ў Беларусі, а 15 былі адпраўленыя ў Літву.