У Беларусі на 36 гадзін абмяжуюць доступ да інтэрнет-сайтаў з-за мяжы
24 сакавіка, Позірк. З 20:00 24 сакавіка да 08:00 26 сакавіка 2026 года доступ да інтэрнет-сайтаў на віртуальным хостынгу з-за межаў Беларусі будзе абмежаваны, паведамляе хостынг-сервіс Hb.by са спасылкай на Аператыўна-аналітычны цэнтр пры прэзідэнце (ААЦ).
ААЦ сцвярджае, што “зафіксаваў пагрозу дэструктыўных уздзеянняў у кіберпрасторы ў перыяд з 24 да 26 сакавіка“ і “абавязаны прыняць ахоўныя меры”.
“Усе сайты працягваюць працаваць у штатным рэжыме для карыстальнікаў унутры краіны. Панелі кіравання, пошта, базы даных і ўнутраныя сервісы будуць даступныя ў поўным аб’ёме. Калі вашы рэсурсы выкарыстоўваюць інтэграцыі з вонкавымі платформамі (аплатныя сістэмы, API замежных сэрвісаў, знешнія формы і фішкі) — у названы перыяд яны могуць працаваць нестабільна“, — адзначаецца ў паведамленні хостара.
25 сакавіка дэмакратычна настроеная частка насельніцтва Беларусі святкуе Дзень Волі — гадавіну абвяшчэння Беларускай Народнай Рэспублікі (БНР) у 1918 годзе.
Святкаванне з 21 сакавіка праходзіць у Польшчы, Літве, ЗША і іншых краінах.
Напярэдадні Следчы камітэт распаўсюдзіў пагрозу ўдзельнікам мерапрыемстваў за мяжой — крымінальным пераследам і канфіскацыяй маёмасці.
18 снежня 2025 года падчас правядзення пасяджэння Усебеларускага народнага сходу на падставе прадпісання ААЦ таксама быў абмежаваны (дэ-факта заблакаваны) доступ з-за межаў Беларусі да сайтаў, размешчаных на віртуальным хостынгу.
У ноч на 10 студзеня 2025 года без VPN у Беларусі не адкрываліся “Ютуб“, “Цікток“, “Тэлеграм“, Twitch, Discord і іншыя месенджары і платформы.
Перабоі ў працы інтэрнету фіксаваліся ў навагоднюю ноч да, падчас і пасля выступу дэмакратычнага лідара Святланы Ціханоўскай на “Ютубе“.
22 лістапада 2024 года на сустрэчы са студэнтамі Аляксандр Лукашэнка заявіў, што цалкам адключыць інтэрнет у выпадку новых масавых акцый пратэсту ў Беларусі, як у 2020 годзе.
Інтэрнет у Беларусі асабліва жорстка блакаваўся ў дзень прэзідэнцкіх выбараў 9 жніўня 2020 года і на працягу трох наступных дзён, а таксама моцна запавольваўся пазней падчас масавых акцый пратэсту.
