Ціханоўская ў 15-ю гадавіну тэракта ў мінскім метро: Праўда мае значэнне, адказ можа даць толькі празрыстае расследаванне
11 красавіка, Позірк. 11 красавіка ёсць днём памяці і болю, які жыве ў сэрцах людзей ужо 15 гадоў, адзначыла беларускі дэмакратычны лідар у чарговую гадавіну тэракта ў мінскім метро.
“Мы ўспамінаем тых, хто загінуў у Мінску 15 гадоў таму. 15 чалавек. Звычайных людзей, якія проста ехалі дадому, спяшаліся да сваіх блізкіх, жылі звычайным жыццём, будавалі планы. І чые жыцці былі жорстка абарваныя ў адзін момант”, — напісала палітык у сваім тэлеграм-канале.
Паводле слоў дэмлідара, гэты дзень ёсць “асабістым болем для многіх беларусаў”, днём “страты родных, хвалявання за параненых, аб’яднання дзеля дапамогі пацярпелым”.
“Памятаеце, як людзі падвозілі пацярпелых, аказвалі медычную дапамогу, шукалі родных па шпіталях? Нават у самыя цяжкія моманты беларусы не засталіся ўбаку — трымаліся разам і дапамагалі адно аднаму, — адзначыла яна. — Гэта памяць, якая застаецца з намі. Але памяць — гэта і адказнасць. Адказнасць перад тымі, каго ўжо няма, і перад тымі, хто жыве сёння”.
“Таму праўда пра гэтую трагедыю таксама мае значэнне. Калі ў грамадстве праз гады застаюцца пытанні, адказ на іх можа даць толькі поўнае, незалежнае і празрыстае расследаванне, якому людзі могуць давяраць. Бяспека людзей — гэта аснова, на якой трымаецца любое грамадства”, — падкрэсліла Ціханоўская.
11 красавіка 2011 года ў 17 гадзін 55 хвілін на станцыі метро “Кастрычніцкая” ў Мінску адбыўся выбух самаробнай радыёкіраванай выбухной прылады.
Паводле афіцыйнай версіі, яна была закладзеная пад лаву насупраць прыпынку другога і трэцяга вагонаў цягнікоў, што накіроўваюцца ў бок станцыі “Плошча Леніна”. Прылада была начыненая паражальнымі элементамі. У выніку тэракту на месцы загінула 11 чалавек, яшчэ чацвёра памерла пазней; пацярпела амаль 200.
Праз некалькі гадзін пасля здарэння на месца прыбыў Аляксандр Лукашэнка з сынам Мікалаем, якому на той момант было шэсць гадоў.
Ранкам наступнага дня КДБ адсправаздачыўся пра высвятленне асобы выканаўцы тэракту, яго абвясцілі ў вышук.
На наступны дзень Лукашэнка заявіў, што тэракт раскрыты, пазней яго арганізатарамі былі названыя Дзмітрый Канавалаў і Уладзіслаў Кавалёў. 30 лістапада 2011 года суд прыгаварыў абодвух да расстрэлу.
Расследаванне здарэння неаднаразова выклікала крытыку з боку незалежных СМІ. Журналісты звярталі ўвагу на шматлікія нестыкоўкі, занадта хуткае расследаванне і кароткі тэрмін ад вынясення прыгавору да прывядзення яго ў выкананне (3,5 месяца).
Тэракт адбыўся на фоне фінансавага крызісу ў Беларусі, які суправаджаўся рэзкай дэвальвацыяй рубля і напружанасцю ў грамадстве. 12 красавіка Еўрасаюз меўся разглядзець пытанне пра новыя санкцыі супраць беларускіх уладаў. Выбух у метро здарыўся напярэдадні. Санкцыі ўведзеныя не былі.
Тэракт у мінскім метро. Праўда чакае змены рэжыму
11 красавіка 2011 года ў 17 гадзін 55 хвілін на станцыі метро “Кастрычніцкая“ ў Мінску адбыўся выбух самаробнай радыёкіраванай выбуховай прылады. Паводле афіцыйнай версіі, яна было закладзена пад лаўку насупраць прыпынку другога і трэцяга вагонаў цягнікоў, што ідуць у бок …
