Для шматдзетных сем’яў адкрыта звыш 153 тыс. дэпазітных рахункаў “Сямейны капітал” — Мінпрацы

13 красавіка, Позірк. На 1 красавіка для шматдзетных сем’яў адкрыта 153,1 тыс. дэпазітных рахункаў “Сямейны капітал”, паведаміла Міністэрства працы і сацыяльнай абароны.

Адкрыта 82,6 тыс. дэпазітных рахункаў на суму 826 млн долараў і 70,4 тыс. дэпазітных рахункаў на суму 1,9 млрд рублёў.

На датэрміновае распараджэнне сродкамі сямейнага капіталу пададзена каля 103 тыс. заяў. З іх на паляпшэнне жыллёвых умоў — 80%, на атрыманне медыцынскіх паслуг — 9%, на атрыманне адукацыі — 10%, на набыццё тавараў для інвалідаў — 1%.

Сямейны капітал прызначаецца шматдзетным сем’ям пры нараджэнні (усынаўленні, удачарэнні) трэцяга або наступнага дзіцяці.

З 1 студзеня 2026 года памер сямейнага капіталу складае 35.505 рублёў, у 2025 годзе памер сямейнага капіталу складаў 33.275 рублёў.

На 1 студзеня 2026 года для шматдзетных сем’яў было адкрыта 151.242 дэпазітных рахункі “Сямейны капітал”, у параўнанні са снежнем 2025-га (150.598) іх колькасць павялічылася на 644 (+0,43%). Зараз Мінпрацы не ўказала дакладную колькасць рахункаў “Сямейны капітал”, абмежаваўшыся акругленнымі данымі.