Падраздзяленні МУС адпрацуюць у Віцебску “дзеянні ў асаблівых умовах”
23 красавіка, Позірк. У Віцебску 24 красавіка пройдуць комплексныя камандна-штабныя вучэнні па праверцы гатоўнасці падраздзяленняў Міністэрства ўнутраных спраў да “дзеянняў у асаблівых умовах“, паведамляе ведамства.
У сувязі з гэтым, як заяўлена, 23 красавіка з 15 да 18 гадзін і 24 красавіка з 14 да 18 гадзін будзе абмежаваны рух усіх відаў транспарту па вул. Церашковай на ўчастку ад скрыжавання з вул. Соф’і Панковай да праспекта Фрунзэ.
“Магчыма перамяшчэнне спецыяльнай і вайсковай тэхнікі”, — гаворыцца ў паведамленні.
Каб пазбегнуць затораў, МУС рэкамендуе кіроўцам загадзя планаваць маршрут руху і выбіраць альтэрнатыўныя шляхі.
Адзначаецца, што адзін з этапаў вучэнняў пройдзе на тэрыторыі ГЦ “Эвіком” (праспект Фрунзэ, 81), у сувязі з чым 23 красавіка гандлёвы цэнтр працуе да 15 гадзін. 24 красавіка ГЦ працаваць не будзе. Паблізу аб’екта могуць быць чутныя “гукі выбухаў і стрэлаў“.
“Хвалявацца не варта”, — паведамляе МУС.
26 сакавіка паведамлялася аб правядзенні аналагічных вучэнняў у Брэсцкай вобласці. У іх бралі ўдзел кіраўнік ведамства Іван Кубракоў, намеснік міністра — камандуючы ўнутранымі войскамі МУС Мікалай Карпянкоў, начальнік абласнога УУС Алег Шулякоўскі, кіраўніцтва аблвыканкама і сумежных структур рэгіёну.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Рэжым Лукашэнкі практычна безупынна праводзіць вучэнні сілавога блока.
