28 жніўня, Позірк. Беларускія ўлады не ўзгаднілі далейшае служэнне ў краіне ксяндза з польскім грамадзянствам Януша Пуліта, які “на працягу 32 гадоў быў пастырам прыходаў у Ружанах і Лыскаве”, паведаміў епіскап Пінскі Антоній Дзям’янка на сайце дыяцэзіі, якую ён ачольвае.
Паводле яго, Пуліт “больш за 32 гады прысвяціў служэнню вернікам на нашай зямлі”: “Ён самааддана адгукнуўся на заклік кардынала Казіміра Свёнтка і настаяцеляў сваёй манаскай кангрэгацыі і ўключыўся ў жыццё Пінскай дыяцэзіі”.
Дыяцэзіі, падкрэсліў Дзям’янка, “вельмі складана, маючы ў распараджэнні невялікую колькасць мясцовых святароў, забяспечыць усе прыходскія супольнасці ад Брэста да Гомеля рэгулярнай пастырскай апекай”, тады як шматгадовыя настаяцелі з’язджаюць з Беларусі “не па сваёй волі”.
Як паведамлялася 16 жніўня, паводле інфармацыі ініцыятывы “Хрысціянская візія”, яшчэ 11 польскіх каталіцкіх святароў Мінска-Магілёўскай архідыяцэзіі могуць пакінуць Беларусь, бо яны не атрымалі дазволу ад упаўнаважанага па справах рэлігій і нацыянальнасцяў на працяг рэлігійнай дзейнасці, а “некаторыя атрымалі такі дазвол на мінімальны тэрмін”.
У сувязі з гэтым старшыня Канферэнцыі каталіцкіх епіскапаў Беларусі, мітрапаліт Мінска-Магілёўскі Юзаф Станеўскі накіраваў просьбу да Аляксандра Лукашэнкі аб “падаўжэнні дазволу на служэнне гэтых святароў у Беларусі”.
Называецца прозвішча аднаго святара — гэта Раман Шульц, які служыў у Беларусі з 2007 года.
28 траўня ў інтэрв’ю Vatican News Станеўскі заявіў пра нястачу каталіцкіх святароў у краіне. Паводле яго слоў, кадравае пытанне для касцёла “застаецца вострым: колькасць духавенства ў самой Беларусі паступова скарачаецца, асабліва ва ўсходніх рэгіёнах”.
У Магілёўскай вобласці адзін святар вымушаны абслугоўваць тры прыходы, “пераадольваючы сотні кіламетраў”, дадаў іерарх.
Сітуацыя ўскладняецца і тым, што святары з Польшчы, якія служылі дзесяцігоддзямі, усё часцей не атрымліваюць дазволу на далейшую працу, адзначыў ён.
20 траўня “Хрысціянская візія” паведаміла пра адмову беларускіх уладаў працягнуць дазвол на далейшае служэнне ў Беларусі пяці каталіцкім святарам і аднаму манаху Мінска-Магілёўскай архідыяцэзіі, якія маюць польскае грамадзянства.
Раней стала вядома пра адмову ў дазволе на далейшае служэнне тром каталіцкім польскім святарам у Віцебскай дыяцэзіі, да гэтага — двум святарам у Пінскай дыяцэзіі.
Многія вернікі і рэлігійныя дзеячы адкрыта выказваліся пра грамадска-палітычны крызіс, які ўзнік на фоне сфальсіфікаваных прэзідэнцкіх выбараў 2020 года і жорсткасці сілавікоў у дачыненні да ўдзельнікаў пратэстных акцый, з прычыны чаго рэжым Лукашэнкі ўзмацніў кантроль рэлігійнай сферы.
У 2023 годзе на заканадаўчым узроўні рэлігійным арганізацыям фактычна забаранілі праяўляць палітычную актыўнасць не ў фарватары ўладаў і абавязалі перарэгістравацца.
Ад пачатку восені 2020 года да канца ліпеня 2026-га, паводле даных “Хрысціянскай візіі”, з рэпрэсіямі ў Беларусі ў той ці іншай форме сутыкнулася не менш за 95 хрысціянскіх служыцеляў, сярод іх 37 каталіцкіх (раней паведамлялася пра 42).
Аўтарызавацца
Забыліся пароль?
Выхад з профілю
