Лукашэнка прапанаваў вярнуцца да савецкай практыкі забеспячэння расійскіх рэгіёнаў беларускімі таварамі

27 кастрычніка, Позірк. Да савецкай практыкі, калі Беларусь забяспечвала таварамі Калінінград, Санкт-Пецярбург, Маскоўскую вобласць і часткова Маскву, прапанаваў вярнуцца Аляксандр Лукашэнка на сустрэчы з губернатарам Санкт-Пецярбурга Аляксандрам Бягловым 27 кастрычніка ў Мінску.

“За значны асабісты ўнёсак у развіццё гандлёва-эканамічных і культурных сувязей, умацаванне міжнароднага супрацоўніцтва паміж Беларуссю і Расіяй” Лукашэнка ўзнагародзіў суразмоўцу ордэнам Пашаны і выказаўся супраць неабходнасці ўзгадняць узнагароджанне з расійскім бокам, назваўшы прэзідэнта Уладзіміра Пуціна. Паводле яго слоў, беларусам і расіянам варта адыходзіць ад такой практыкі і ўзнагароджваць тых, хто гэтага заслугоўвае.

Прамоўца адзначыў, што “ў савецкі час Беларусь павінна была вырабляць і пастаўляць у гэтыя рэгіёны прадукцыю, якой там не хапала”.

На яго думку, Масква цяпер настолькі вялікая, што беларускім прадпрыемствам наўрад ці ўдасца здолець увесь аб’ём патрэбаў, але трэба развіваць супрацоўніцтва найперш з названымі рэгіёнамі.

11 кастрычніка 2013 года на прэс-канферэнцыі для расійскіх журналістаў Лукашэнка заявіў, што “з задавальненнем забраў бы Калінінградскую вобласць у склад Беларусі”. Тады ён таксама сцвярджаў, што ў савецкі час Беларусь адказвала за гэты рэгіён, і распавёў, што прапаноўваў Пуціну перадаць беларускім уладам мясцовыя землі для сельскагаспадарчага асваення.

У лістападзе 2019 года Лукашэнка зноў закрануў гэтую тэму на сустрэчы з губернатарам Калінінградскай вобласці Антонам Аліханавым. Паводле яго слоў, у СССР прапрацоўвалі варыянты далучэння рэгіёна да Беларусі, але ён дапусціў, што ў такім выпадку магла паўтарыцца сітуацыя з Крымам.

У чэрвені 2025 года падчас сустрэчы з цяперашнім губернатарам Калінінградскай вобласці Аляксеем Бяспрозваных Лукашэнка зноў заявіў , што ў савецкі час Беларусь адказвала за гэты рэгіён. Ён таксама сцвярджаў, што большасць жыхароў Калінінграда — беларусы, аднак даныя расійскага перапісу насельніцтва гэтага не пацвярджаюць.