Пастаянны прадстаўнік ЗША пры ААН: Любыя атакі вагнераўцаў з беларускай тэрыторыі будуць лічыцца атакамі ўладаў РФ

2 жніўня, Позірк. Адказнасць за любыя агрэсіўныя дзеянні наймітаў ПВК “Вагнер”, якія знаходзяцца на беларускай тэрыторыі, будзе ўскладацца на ўлады Расіі, вынікае з заявы пастаяннага прадстаўніка ЗША пры ААН Лінды Томас-Грынфілд на прэс-канферэнцыі ў Нью-Йорку.

На пытанне, ці насцярожаныя Злучаныя Штаты Амерыкі прысутнасцю расійскіх наймітаў у Беларусі — каля мяжы з Польшчай, дыпламат адказала, што ЗША выказвалі занепакоенасць наконт вагнераўцаў “задоўга да таго, як тыя трапілі ў прэсу праз фактычны напад на ўласныя ўлады”, а таксама у сувязі з іх “варожай актыўнасцю на афрыканскім кантыненце”.

“Таму мы, безумоўна, занепакоеныя тым, што гэтая група, якая дзейнічае на ўказанне расійскіх уладаў (паколькі яны не працуюць незалежна ад уладаў РФ), уяўляе пагрозу для ўсіх нас. І мы мусім дакладна даць зразумець: любыя атакі групы “Вагнер” будуць разглядацца як атакі з боку расійскіх уладаў”, — падкрэсліла Томас-Грынфілд.

ЗША будуць выконваць функцыі старшыні ў Савеце Бяспекі ААН на працягу жніўня.

Паводле інфармацыі маніторынгавага праекта “Беларускі гаюн”, найміты ПВК “Вагнер” з сярэдзіны ліпеня рэгулярна прыбываюць у Беларусь. Паводле яго ацэнак, у краіне не менш за 3,5 тыс. наймітаў, паводле даных украінскай памежнай службы — крыху больш за 5 тыс.

12 ліпеня кіраўнік Камітэта Дзярждумы Расіі па абароне Андрэй Картаполаў заявіў, што задача “Вагнера” — захоп Сувалкскага калідора (тэрыторыі Польшчы і Літвы паміж Беларуссю і Калінінградскай вобласцю РФ).

На сустрэчы з прэзідэнтам РФ Уладзімірам Пуціным 23 ліпеня ў Санкт-Пецярбургу Аляксандр Лукашэнка заявіў пра жаданне вагнераўцаў, якія знаходзяцца ў Беларусі, “схадзіць на экскурсію” ў Варшаву і Жэшуў — цэнтр Падкарпацкага ваяводства Польшчы, праз які Украіне пастаўляецца заходняя зброя.

29 ліпеня ў Глівіцы польскі прэм’ер-міністр Матэвуш Маравецкі заявіў: Варшава мае інфармацыю пра тое, што “больш як 100 наймітаў групы “Вагнер” рухаецца ў кірунку Сувалкскага калідора, пад Гроднам у Беларусі”. Ён мяркуе, што найміты могуць выкарыстоўваць нелегальных мігрантаў для дэстабілізацыі сітуацыі на мяжы альбо паспрабуюць трапіць на польскую тэрыторыю.

1 жніўня Лукашэнка заявіў, што “ніякія атрады” вагнераўцаў у заходнюю частку Беларусі “не перамяшчаліся”, а калі і перамяшчаліся, то “для таго, каб перадаць баявы досвед брыгадам, якія сканцэнтраваныя ў Брэсце і Гродне”. Паводле яго слоў, Беларусі Сувалкскі калідор “тысячу гадоў не патрэбны”.

Гл. таксама:

Лукашэнка хоча захаваць у Беларусі ПВК “Вагнер”, якая “абсалютна бясплатна” перадае досвед вайскоўцам (дапоўнена)