Адама Мальдзіса пахаваюць 5 студзеня ў Астравецкім раёне

4 студзеня. Развітанне з вядомым дзеячам беларускай культуры, навукоўцам, літаратуразнаўцам Адамам Мальдзісам пройдзе 5 студзеня ў 11.00 у мінскім касцёле святых Сымона і Алены (Чырвоны касцёл), паведаміў у “Фэйсбуку” сын памерлага Яраслаў Мальдзіс.

Навукоўца пахаваюць у той жа дзень у вёсцы Задворнікі (Астравецкі раён Гродзенскай вобласці).

Мальдзіс памёр 3 студзеня ў рэанімацыі аддзялення гнойнай хірургіі 2-й гарадской клінічнай бальніцы Мінска. Яму было 89 гадоў.

Адам Іосіфавіч Мальдзіс нарадзіўся ў вёсцы Расолы Астравецкага раёна. У 1956 годзе скончыў аддзяленне журналістыкі БДУ. З сярэдзіны 1950-х пачаў выступаць у друку з артыкуламі і рэцэнзіямі як даследчык беларускай літаратуры і культуры ХІХ стагоддзя. Напісаў і абараніў кандыдацкую і доктарскую дысертацыі.

Аўтар кніг пра беларуска-польскія літаратурныя сувязі. Пісаў пра беларускую культурную спадчыну, у тым ліку за мяжой. Раскрыў таямніцы знікнення шматлікіх рэліквій Беларусі — рукапісаў, ікон, карцін, старажытных бібліятэк, партрэтаў, гравюр, прадметаў дэкаратыўна-прыкладнога мастацтва. Дзякуючы яго высілкам некаторыя артэфакты ўдалося вярнуць на радзіму.

Да канца жыцця Мальдзіс займаўся пошукамі Крыжа Еўфрасінні Полацкай і даследаваў абставіны знікнення гэтай беларускай святыні. Выявіў мноства слуцкіх паясоў, якія былі вывезены з Беларусі.

Мальдзіс даказаў, што свае знакамітыя паланэзы кампазітар і грамадскі дзеяч Міхаіл Клеафас Агінскі ствараў менавіта ў Беларусі — у Залессі цяперашняга Смаргонскага раёна, а не ў Польшчы.

З 2010 года Мальдзіс быў ганаровым старшынём Міжнароднай асацыяцыі беларусістаў. Біяграфічны цэнтр Кембрыджскага ўніверсітэта ў 1997 годзе прызнаў беларускага прафесара “Чалавекам года” ў галіне культуралогіі.

Быў узнагароджаны медалём Францыска Скарыны.

Ганаровы грамадзянін Польшчы.