Развітанне са Станіславам Шушкевічам адбудзецца 6–7 траўня ў касцёле св. Сымона і Алены ў Мінску

5 траўня, BPN. Развітанне з першым кіраўніком незалежнай Беларусі Станіславам Шушкевічам, які памёр напярэдадні, пройдзе ў касцёле св. Сымона і Алены ў Мінску, паведаміў у “Фэйсбуку” грамадскі актывіст Сяргей Мельянец.

Яно пачнецца 6 траўня а 20-й гадзіне і працягнецца да 14:30 7 траўня.

Запісы ў кнігах памяці і смутку ў сувязі са смерцю палітыка таксама можна пакінуць у Варшаве (Беларускі моладзевы хаб, пл. Канстытуцыі, 6) і Вільнюсе (Беларускі дом, вул. Вільняус, 20).

Станіслаў Шушкевіч памёр у ноч на 4 траўня на 88-м годзе жыцця. Будучы абраным на пасаду старшыні Вярхоўнага Савета 12-га склікання, ён стаў першым кіраўніком незалежнай Беларусі.

Спачуванні ў сувязі з яго смерцю выказалі прэм’ер-міністр і кіраўнік МЗС Літвы, дзяржсакратар ЗША, прэзідэнт Польшчы і іншыя былыя і дзейныя замежныя палітыкі.

“Мы са смуткам адзначаем адыход з жыцця Станіслава Шушкевіча, які прывёў Беларусь да незалежнасці. Нашы думкі з яго блізкімі і народам Беларусі, якія вядуць барацьбу за дэмакратыю, дабрабыт і мір”, — напісаў у Twitter дзяржаўны сакратар ЗША Энтані Блінкен.

“З глыбокім жалем развітваюся са Станіславам Шушкевічам, першым кіраўніком і бацькам незалежнай Беларусі. Польшча ніколі не забудзе яго ролю ў распадзе Савецкага Саюза ў 1991 годзе і стварэнні свабодных Беларусі, Украіны і іншых краін”, — зазначыў у гэтай жа сацсетцы прэзідэнт Польшчы Анджэй Дуда..

Спачуванні ў сувязі са смерцю Шушкевіча выказалі дэмакратычны лідар Беларусі Святлана Ціханоўская, кіраўнік Народнага антыкрызіснага ўпраўлення Павел Латушка, каманда штаба экс-прэтэндэнта ў прэзідэнты Віктара Бабарыкі і іншыя прадстаўнікі дэмсіл.

Беларускія ўлады, да якіх Шушкевіч знаходзіўся ў апазіцыі, яго смерць праігнаравалі.