Прэм’ер Літвы бачыць падставы для ўніфікацыі абмежаванняў у адносінах да грамадзян Беларусі і РФ

10 жніўня, Позірк. Прэм’ер-міністр Літвы Інгрыда Шыманітэ ўхваліла б уніфікацыю абмежаванняў для грамадзян Беларусі з тымі, якія цяпер прымяняюцца да расіян, таму што для гэтага цяпер “ёсць нямала падстаў”. Аб гэтым кіраўнік літоўскага ўрада заявіла 10 жніўня ў інтэрв’ю радыёстанцыі Ziniu radijas.

На думку прэм’ер-міністра, пасля прыняцця закона аб абмежавальных мерах для грамадзян Расіі і Беларусі, у якім для апошніх уведзена менш абмежаванняў, “сітуацыя змянілася”.

“Больш за ўсё змянілася пасля гэтага так званага “вагнераўскага” мецяжу і пасля таго, як Лукашэнка вырашыў пусціць у сваю краіну тэрарыстычную арганізацыю. Гэта мяняе і агульнае ўспрыманне сітуацыі, і разуменне рызык”, — патлумачыла Шыманітэ.

Прэм’ер-міністр падкрэсліла, што гуманітарныя выключэнні для праціўнікаў рэжыму і апазіцыянераў павінны заставацца.

Каментуючы інфармацыю аб тым, што Літва плануе закрыць з сярэдзіны жніўня два пагранічныя пункты з Беларуссю — Шумскас і Цвярачус, Шыманітэ падкрэсліла, што пры разглядзе гэтага пытання было вырашана пракансультавацца з рэгіянальнымі партнёрамі, паколькі такія крокі могуць адбіцца на іншых краінах.

У якасці прыкладу яна прывяла закрыццё пагранічных пунктаў пропуску ў Польшчы, пасля чаго выраслі чэргі грузавікоў у Літве.

“Калі мы прымем такое рашэнне, гэта абавязкова адаб’ецца на Латвіі. Таму мы дамовіліся, што любыя далейшыя рашэнні, калі ў іх узнікне неабходнасць, будуць узгадняцца паміж трыма дзяржавамі”, — зазначыла кіраўнік урада Літвы.

Заявы Шыманітэ прагучалі на наступны дзень пасля абмеркавання гэтага пытання на сустрэчы беларускага дэмакратычнага лідара Святланы Ціханоўскай з прэзідэнтам Літвы Гітанасам Наўседам.