Беларусь апусцілася ў рэйтынгу “сілы пашпартоў” для бязвізавых падарожжаў

1 верасня, Позірк. За жнівень Беларусь страціла адну пазіцыю ў рэйтынгу “сілы пашпартоў” для бязвізавых падарожжаў, перамясціўшыся з 64-га на 65-е месца, сведчыць новы “Індэкс пашпартоў — 2023” кансалтынгавай кампаніі Henley & Partners і Міжнароднай асацыяцыі паветранага транспарту (IATA), апублікаваны 1 верасня. 

Паводле інфармацыі даследнікаў, беларускія грамадзяне маглі наведваць без візы або ў спрошчаным рэжыме 79 дзяржаў (колькасць краін з ліпеня не змянілася). Столькі ж краін было адчынена для наведвання ў бязвізавым рэжыме для ўладальнікаў пашпартоў Лесота і Тайланда. 

Лідарам “Індэкса пашпартоў” з’яўляецца Сінгапур, грамадзяне якога могуць свабодна ўязджаць у 192 краіны свету (у ліпені — 1-я; 192). 

Сярод былых рэспублік СССР на сваіх месцах у рэйтынгу засталіся: Літва (8-е месца, 184 краіны), Латвія (9-е, 183), Эстонія (10-е, 182), Украіна (30-е, 146). 

Астатнія постсавецкія дзяржавы страцілі адну пазіцыю: Малдова (47-я, 121), Грузія (49-я; 117), Расія (50-я, 115), Казахстан (67-я, 77), Азербайджан (73-е, 69), Арменія (75-е, 66), Кыргызстан (77-е, 63), Таджыкістан і Узбекістан (абодва — 79-е, 59), Туркменістан (88-е, 50). 

Індэкс пашпартоў Henley & Partners і IATA (раней Індэкс візавых абмежаванняў, пераназваны ў 2018 годзе) аналізуе візавыя правілы 227 дзяржаў і тэрыторый і ранжыруе іх па колькасці краін бязвізавага ўезду. 

Henley & Partners — міжнародная кансалтынгавая кампанія, якая спецыялізуецца на распрацоўцы дзяржаўных праграм прадастаўлення грамадзянства і віду на жыхарства праз інвестыцыі. Ацэньвае сілу пашпартоў краін свету з 2006 года.