Вярхоўны суд пакінуў без змяненняў прыгавор па справе аб “змове з мэтай захопу дзяржулады неканстытуцыйным шляхам”

29 лістапада, BPN. Вярхоўны суд па выніках разгляду апеляцыльнай скаргі 29 лістапада пакінуў у сіле прыгавор старшыні Партыі БНФ Рыгору Кастусёву — 10 гадоў пазбаўлення волі, паведаміў на сваёй старонцы ў “Фэйсбуку” зяць палітыка Зміцер Антончык.

Паводле інфармацыі “Еўрарадыё”, ВС таксама пакінуў без зменаў прысуды астатнім асуджаным па справе аб “змове з мэтай захопу дзяржаўнай улады неканстытуцыйным шляхам”: беларуска-амерыканскаму адвакату Юрыю Зянковічу — 11 гадоў зняволення, палітолагу і літаратуразнаўцу Аляксандру Фядуту — 10, бухгалтару Зянковіча Вользе Галубовіч і кіроўцу вялікагрузнага аўтамабіля Дзянісу Краўчуку — 2,5 года.

Апеляцыі разглядаў суддзя Уладзімір Давыдаў.

У першай інстанцыі фігурантаў згаданай справы 5 верасня асудзіў да зняволення суддзя Уладзімір Арэшка з Мінскага абласнога суда.

Зянковіч прызнаны вінаватым паводле ч. 1 арт. 357 (змова, здзейсненая з мэтай захопу дзяржаўнай улады неканстытуцыйным шляхам), ч. 1 арт. 361¹ (стварэнне экстрэмісцкага фармавання і кіраўніцтва такім фармаваннем), ч. 3 арт. 361 (публічныя заклікі да захопу дзяржаўнай улады, здзяйснення іншых дзеянняў, накіраваных на прычыненне шкоды нацыянальнай бяспецы Беларусі) і ч. 3 арт. 130 (распальванне сацыяльнай варожасці ці варажнечы <…> групай асоб) Крымінальнага кодэкса.

Зянковіч заключыў дасудовую дамову са следствам, што азначае прызнанне віны і выкрыццё іншых фігурантаў справы. Згодна з арт. 468⁸ Крымінальна-працэсуальнага кодэкса, абвінавачаны ў сваю чаргу атрымлівае гарантыю, што тэрмін пакарання будзе скарочаны ўдвая.

Фядута асуджаны паводле ч. 1 арт. 357 КК. Ён прызнаў удзел у змове, але не пагадзіўся з тым, што гэта было зроблена “з нізкіх матываў”.

Кастусёў, які пакутуе ад анкалагічнага захворвання, прызнаны вінаватым таксама паводле ч. 1 арт. 357 КК, віну адмаўляў. Ён растлумачыў, што ўдзельнічаў у зум-канферэнцыях “змоўшчыкаў” як слухач.

Галубовіч і Краўчук асуджаныя паводле ч. 1 арт. 342 КК (актыўны ўдзел у групавых дзеяннях, якія груба парушаюць грамадскі парадак).

Па гэтай жа справе праходзілі псіхіятр Дзмітрый Шчыгельскі, які жыве за мяжой, экс-супрацоўнік спецпадраздзялення МУС “Алмаз” Ігар Макар, а таксама Аляксандр Перапечка, Павел Кулажэнка і Віталь Макаранка.