Лукашэнка запатрабаваў вырашыць праблему дэбіторскай запазычанасці

3 кастрычніка, Позірк. Для беларускай эканомікі “пытаннем пытанняў” з’яўляецца дэбіторская запазычанасць, заявіў Аляксандр Лукашэнка 3 кастрычніка на нарадзе па продажах айчыннай прадукцыі.

“Па “дэбіторцы”, я сказаў, ніякіх спасылак [не павінна быць] на тое, што недзе плацяжы не ідуць, яшчэ нешта”, — цытуе Лукашэнку яго прэс-служба.

Паводле яго слоў, у Нацыянальным банку і “спадарожных структурах” працуе “не адна тысяча” супрацоўнікаў. “Таму давайце разам з урадам займайцеся і пачынайце працаваць, калі можаце. А на гэтую тэму, зноў жа, больш размоваў быць не можа”, — заявіў Лукашэнка.

Паводле даных Нацыянальнага статыстычнага камітэта, дэбіторская запазычанасць (пазыкі прадпрыемству) на 1 жніўня складала 65,5 млрд рублёў (на тую ж дату 2022-га — 59,3 млрд; +10,5%), у тым ліку пратэрмінаваная — 10,2 млрд (8,5 млрд; +20%).

Крэдыторская запазычанасць (пазыкі прадпрыемства) — 75 млрд рублёў (66 млрд; +13,6%), у тым ліку пратэрмінаваная — 9,8 млрд (8,6 млрд; +14%).

“Прымаць своечасовыя меры, каб не дапускаць дэбіторскай запазычанасці” яшчэ ў чэрвені 2021 года Лукашэнка патрабаваў ад Пятра Пархомчыка, які тады ўзначальваў Міністэрства прамысловасці, а цяпер займае пасаду віцэ-прэм’ера. “Прадукцыю адправілі — грошы не атрымалі і потым пачынаем ваяваць за гэтыя грошы. Глядзіце, каб [так] не было”, — папярэджваў ён тады.

31 кастрычніка 2022 года прэм’ер-міністр Раман Галоўчанка заявіў пра занепакоенасць прыростам знешняй дэбіторскай запазычанасці. “У большай ступені гэта звязана з тым, што грошы “ходзяць” не так хутка, як нам хацелася б. Гэта праблема знаходзіцца пад кантролем і не носіць прыгнятаючага і дэстабілізуючага ўздзеяння на працу”, — заявіў кіраўнік урада.

22 чэрвеня 2023-га на нарадзе з кіраўніцтвам Савета міністраў Лукашэнка звярнуў увагу на загружанасць складоў і наяўнасць вялікай дэбіторскай запазычанасці.