Праект “Будзьма” паведаміў аб крытычнай фінансавай сітуацыі

1 красавіка, Позірк. Аб сваёй крытычнай фінансавай сітуацыі паведаміў 1 красавіка культурна-асветніцкі праект “Будзьма беларусамі” (budzma.org) і звярнуўся з гэтай нагоды за падтрымкай да чытачоў.

“Сёння нам, як ніколі, патрэбна вашая дапамога, каб і надалей мы маглі ствараць для вас унікальны беларускі кантэнт. Мы ведаем, што шмат хто з вас рос разам з “Будзьмай”, пачынаў знаёміцца з беларушчынай праз нашу кампанію, глядзеў і чытаў нас, наведваў нашыя мерапрыемствы. Мы шчыра за гэта ўдзячныя, а зараз просім вашай падтрымкі”, — адзначаецца ў паведамленні.

Удакладняецца, што для працягу працы каманды праз партал і сацыяльныя сеткі, а таксама для выхаду новых відэа на платформах неабходна 16 тыс. еўра ў месяц.

“Безумоўна, мы і самі шукаем шляхі для вырашэння фінансавых цяжкасцяў, аднак сёння сітуацыя крытычная. Мы не здолеем працягнуць працу без вашай дапамогі”, — падкрэслілі ў “Будзьма”.

Пры гэтым праект заклікае беларусаў, якія знаходзяцца ў краіне, не рызыкаваць і не рабіць ахвяраванняў.

На партале можна знайсці некалькі спосабаў для дапамогі праекту.

Кантэнт сайта і старонак у сацыяльных сетках праекта “Будзьма” быў прызнаны “экстрэмісцкімі матэрыяламі” у 2023 годзе.

“Будзьма беларусамі” паўстала ў 2008 годзе як культурна-асветніцкая кампанія па ініцыятыве Згуртавання беларусаў свету “Бацькаўшчына” (ліквідавана ў Беларусі паводле ініцыятывы ўладаў у 2021 годзе, працягвае працу за мяжой).

Шэраг беларускіх медыяпраектаў, якія вымушана працуюць у выгнанні, сутыкнуліся з фінансавымі цяжкасцямі ў апошні час.