Лукашэнка: ААН ператварылася ў дыпламатычнае казіно, дзе пануюць заходнія верхаводы

15 чэрвеня, BPN. Арганізацыя Аб’яднаных Нацый “з цывілізаванай дыялогавай пляцоўкі для вырашэння спрэчак і дыскусій пра будучае развіццё свету” ператварылася ў “дыпламатычнае казіно, дзе пануюць заходнія верхаводы”, заявіў Аляксандр Лукашэнка 15 чэрвеня ў Мінску, прымаючы даверчыя граматы паслоў дзевяці дзяржаў (Гана, Іран, Маўрытанія, Мексіка, Панама, Паўднёвая Карэя, Таджыкістан, Тайланд, Эквадор). 

На яго думку, “калектыўны Захад” толькі “пакуль пануе ў ААН”. “Мы выступаем за шматпалярны, справядлівы свет з гарантыямі развіцця для ўсіх краін без выключэння. У гэты час Захад разбурае сістэму еўрапейскай бяспекі, створаную пасля Другой сусветнай вайны”, — цытуе Лукашэнку яго прэс-служба. 

Прымаючы даверчыя граматы, Лукашэнка нагадаў, што з Таджыкістанам у Беларусі “трывалыя сувязі яшчэ з часоў Савецкага Саюза”, адзначыў супрацоўніцтва з Іранам “пад прыгнётам несправядлівых, супрацьзаконных санкцый”. 

Тайланд беларускія ўлады разглядаюць як “аднаго з перспектыўных партнёраў у Паўднёва-Усходняй Азіі”, бачаць “значныя магчымасці для пашырэння двухбаковага супрацоўніцтва ў прамысловасці, сельскай гаспадарцы, фармацэўтыцы”. 

Кажучы пра Паўднёвую Карэю, Лукашэнка нагадаў пра шэраг праектаў, па якіх вядзецца праца, “але гэтага мала”. 

У Гане беларускі бок “гатовы ўдзельнічаць не толькі ў сельскагаспадарчых, але і ў інфраструктурных, энергетычных і адукацыйных праектах”. Маўрытаніі Лукашэнка гатовы дапамагчы “нарасціць прамысловы патэнцыял, гарантаваць харчовую бяспеку, мадэрнізаваць транспартную інфраструктуру, павысіць кваліфікацыю кадраў”. 

Беларусь і Мексіканскія Злучаныя Штаты, паводле яго слоў, “маюць вытворчы патэнцыял, развітую прамысловасць і сельскую гаспадарку”, магчымасці якіх “павінны быць максімальна выкарыстаныя для павелічэння гандлю”, нягледзячы на тое, што ў Мексікі “вельмі вялікі і развіты паўночны сусед”.

З Панамай Лукашэнка гатовы супрацоўнічаць у сферах машынабудавання, перапрацоўчай прамысловасці, хіміі, нафтахіміі, транспарту, лагістыкі, альтэрнатыўнай энергетыкі, а Эквадору ён прапанаваў паслугі ў механізацыі сельскай гаспадаркі, па развіцці інфраструктуры і здабычы карысных выкапняў.