Эдуарда Бабарыку прыгаварылі да пазбаўлення волі ў калоніі на восем гадоў

5 ліпеня, BPN. Мінскі абласны суд 5 ліпеня прыгаварыў палітвязня Эдуарда Бабарыку да пазбаўлення волі ў калоніі на восем гадоў, паведамляе праваабарончы цэнтр “Вясна”. 

Суддзя Уладзімір Арэшка прызнаў Бабарыку вінаватым паводле трох артыкулаў Крымінальнага кодэкса: ч. 3 арт. 243 (ухіленне ад выплаты падаткаў), ч. 3 арт. 130 (распальванне расавай, нацыянальнай, рэлігійнай або іншай сацыяльнай варожасці або варажнечы), ч. 1 арт. 293 (масавыя беспарадкі). 
 
Першапачаткова Эдуарда Бабарыку абвінавацілі ва ўхіленні ад выплаты падаткаў у асабліва буйным памеры. Праз 18 месяцаў, калі скончыўся максімальна магчымы тэрмін утрымання пад вартай падчас папярэдняга следства, стала вядома, што яму прад’явілі новыя абвінавачанні паводле ч. 3 арт. 130 і ч. 1 арт. 293. 
 
Разбіральніцтва па справе Эдуарда Бабарыкі праходзіла з 22 траўня. Абвінавачаны прабыў у следчым ізалятары больш за тры гады. 
 
Да затрымання 18 чэрвеня 2020 года разам з бацькам, былым банкірам Віктарам Бабарыкам, Эдуард Бабарыка кіраваў краўдфандынгавымі платформамі Ulej і MolaMola, а таксама быў кіраўніком ініцыятыўнай групы па зборы подпісаў за вылучэнне Бабарыкі-старэйшага кандыдатам у прэзідэнты. 
 
6 ліпеня 2021 года Вярхоўны суд прыгаварыў Віктара Бабарыку да 14 гадоў пазбаўлення волі ва ўмовах узмоцненага рэжыму за “атрыманне хабару ў асабліва буйным памеры” (ч. 3 арт. 430) і “легалізацыю сродкаў, атрыманых злачынным шляхам” (ч. 2 арт. 235). З 28 красавіка дакладна не вядома, дзе ён знаходзіцца. Напярэдадні гэтай даты работнікі наваполацкай бальніцы ананімна паведамілі, што туды быў дастаўлены Бабарыка, які адбываў тэрмін у мясцовай калоніі, з пнеўматораксам і слядамі збіцця. 
 
Праваабаронцы паведамлялі, што Віктар Бабарыка быў у спісе сведкаў па справе Эдуарда Бабарыкі, аднак не быў дастаўлены ў суд.