За чатыры гады пагалоўе буйной рагатай жывёлы ў Беларусі скарацілася больш як на 68,8 тыс.
Фота мае ілюстрацыйны характар
21 лістапада, Позірк. На 1 лістапада 2023 года пагалоўе буйной рагатай жывёлы (каровы, быкі, цяляты ды інш.) у Беларусі складала 4 млн 143,3 тыс. — на 1,6% менш (-68,8 тыс.), чым на аналагічную дату 2019-га, сведчаць даныя Нацыянальнага статыстычнага камітэта.
За кастрычнік 2023 года пагалоўе стала меншым на 0,6% (-25,4 тыс.).
Пагалоўе кароў за чатыры гады скарацілася на 2,1% (-29,3 тыс.), за месяц — на 0,05% (-800), свіней — на 8,2% і 0,6% адпаведна (-209, 8 тыс. і -15,1 тыс.). Колькасць птушкі за чатыры гады знізілася на 4,1% (-2 млн 57,1 тыс.), за месяц — вырасла на 1,7% (+826,9 тыс.).
19 кастрычніка Генеральная пракуратура паведаміла пра “факты злачынных дзеянняў службовых асоб” аднаго з аграрных прадпрыемстваў Клецкага раёна (Мінская вобласць). Фігуранты крымінальнай справы “скрылі падзёж 211 галоў буйной рагатай жывёлы коштам звыш 135 тыс. рублёў”.
Паводле даных МУС, у 2022 годзе было распачата 480 крымінальных спраў, звязаных з утойваннем падзяжу, ад пачатку гэтага года — 205, што складае трэць агульнай колькасці эканамічных злачынстваў у аграрнай сферы.
22 верасня ў Салігорску (Мінская вобласць) на семінары-нарадзе аб развіцці жывёлагадоўлі Аляксандр Лукашэнка заявіў, што ў 2022 годзе вытворчасць буйной рагатай жывёлы знізілася ў Гомельскай, Віцебскай і Магілёўскай абласцях.
“З года ў год пагалоўе буйной рагатай жывёлы зніжаецца: за пяць гадоў — больш чым на 100 тысяч галоў, у тым ліку ў 2022 годзе — на 22 тысячы. Асноўная прычына — падзёж (2021 год — 102,8 тысячы галоў, 2022 год — 111 тысяч галоў). Летась рост гэтага паказчыка — у 69 раёнах краіны. Прычым самыя высокія паказчыкі былі ў Старадарожскім (у 3 разы) і Салігорскім (у 2,2 раза) раёнах Мінскай вобласці, Шумілінскім раёне Віцебскай вобласці (у 2 разы)”, — адзначыў ён.
Сёлета, паводле даных Лукашэнкі, рост падзяжу дапушчаны ў 53 раёнах, а ў 14 перавысіў леташні ўзровень у 1,5 раза. У Чашніцкім раёне Віцебскай вобласці склон вырас амаль у 3 разы, у Краснапольскім раёне Магілёўскай вобласці — у 4.
У асобных сельгасарганізацыях жывёлу ўтрымліваюць у антысанітарных умовах, адсутнічае падсцілачны матэрыял, не своечасова прыбіраецца гной, не выконваюцца рацыёны кармлення і тэмпературны рэжым, заявіў Лукашэнка.
У сакавіку 2019 года ён зладзіў “кадравую чыстку” падчас наведвання аграхолдынгу “Купалаўскі” ў Магілёўскай вобласці. Умовы ўтрымання жывёлы ён параўнаў з Асвенцымам — нацысцкім лагерам смерці на тэрыторыі Польшчы ў гады Другой сусветнай вайны.