Рыжанкоў і кіраўнік МЗС Узбекістана дамовіліся аб распрацоўцы “комплекснай дарожнай карты” двухбаковага супрацоўніцтва
13 чэрвеня, Позірк. Дамоўленасці аб распрацоўцы “комплекснай дарожнай карты ўзаемадзеяння на бліжэйшыя гады” дасягнулі на сустрэчы 13 чэрвеня ў Ташкенце міністры замежных спраў Беларусі і Узбекістана Максім Рыжанкоў і Бахціёр Саідаў, паведамляе прэс-служба беларускага знешнепалітычнага ведамства.
Адзначаецца, што на сустрэчы бакі “канстатавалі высокі ўзровень двухбаковых адносін, заснаваных на волі кіраўнікоў дзяржаў”.
Таксама паведамляецца аб дамоўленасцях па “пераглядзе беларуска-ўзбекскай дагаворна-прававой базы для абнаўлення інстытуцыйных асноў супрацоўніцтва” і “прапрацоўцы стварэння сумеснага фонду для фінансавання інвестыцыйных праектаў”.
Рыжанкоў, як заяўляецца, “адзначыў ключавую ролю Узбекістана ў рэгіёне і патэнцыял лакалізацыі ў ім беларускіх вытворчасцяў”.
“Бакі абмяняліся меркаваннямі адносна міжнароднага і рэгіянальнага парадку дня, падкрэсліўшы важнасць узаемадзеяння ў ААН, СНД і ШАС, блізкасць падыходаў да фарміравання шматпалярнага светаўладкавання і неабходнасць узаемнай падтрымкі на міжнародных пляцоўках. Падчас перамоў узгоднены графік мерапрыемстваў: візіты на вышэйшым і высокім узроўнях, пасяджэнне сумеснай міжурадавай камісіі па двухбаковым супрацоўніцтве <…> у Мінску”, — гаворыцца ў рэлізе.
Кіраўнік МЗС Беларусі правёў у Ташкенце 13 чэрвеня яшчэ шэраг сустрэч, у тым ліку — з прадстаўнікамі беларускага бізнесу, які “рэалізуе ў Узбекістане буйныя інвестыцыйныя праекты”. На сустрэчы абмяркоўваліся “пытанні прасоўвання беларускай прадукцыі ва Узбекістане і на рынках краін рэгіёна”.
11 красавіка 2024 года з Саідавым у Мінску сустракаўся Аляксандр Лукашэнка. Асаблівую ўвагу кіраўніка МЗС Узбекістана ён звярнуў на стварэнне сумесных з Беларуссю прадпрыемстваў.
“Давайце будзем прадметна ў гэтым кірунку працаваць. Мы ў гэтым зацікаўленыя. У нас ёсць што прапанаваць Узбекістану. Думаю, што, знаходзячыся тут, у Беларусі, калі вы захочаце паглядзець нейкія нашы прадпрыемствы, калі ласка, мы арганізуем у любы час наведванне любога прадпрыемства. Каб вы змаглі пераканацца, што яго прадукцыя прыдатная для прымянення ва Узбекістане”, — сказаў Лукашэнка.
Лукашэнка наведваў Узбекістан у лютым 2024 года.
