Лукашэнка прыгразіў “разукамплектаваць” урад і аблвыканкамы, калі да канца года фермы не напоўняцца статкам

22 верасня, Позірк. Укамплектаваць фермы і забяспечыць прырост малочнага статка да канца 2023 года даручыў Аляксандр Лукашэнка 22 верасня ў Салігорску (Мінская вобласць) на рэспубліканскім семінары-нарадзе аб развіцці жывёлагадоўлі.

“Персанальная адказнасць” за выкананне гэтага даручэння ўскладзена на міністра сельскай гаспадаркі і харчавання Сяргея Барташа (прызначаны на пасаду 8 жніўня), Савет міністраў і старшынь аблвыканкамаў.

Паводле слоў Лукашэнкі, якія перадае яго прэс-служба, “недаўкамплектавана амаль 16 тысяч жывёламесцаў”. Фермы павінны напоўніць “статкі з высокай прадуктыўнасцю”, “для птушачкі ўкамплектаваць” іх “не атрымаецца”.

“Калі вы гэтага не зробіце, калі вы не ўкамплектуеце гэтыя комплексы, я вам абяцаю, што “разукамплектую” ўвесь склад ваш. Рашучасці ў мяне дастаткова, — сказаў ён. — Падлашчвацца я перад вамі [не стану], ніколі не рабіў гэтага і не буду, якія б электаральныя [кампаніі] перад намі ні стаялі. Бо пахаваем краіну, скацімся да таго, што не 8 мільярдаў долараў экспарт [сельгаспрадукцыі будзе, як у 2022 годзе], карміць свой народ не будзе чым”.

“Яшчэ раз паўтараю: мы пабудавалі нямала малочнатаварных комплексаў. 16 тысяч галоў неўкамплектавана! У вас засталося няшмат часу, каб <…> гэтыя комплексы ўкамплектаваць і паставіць жывёлу”, — папярэдзіў чыноўнікаў Лукашэнка.