Мінская міліцыя правяла вучэнні “напярэдадні выбарчай кампаніі 2024 года”
29 лістапада, Позірк. Тактыка-спецыяльныя вучэнні супрацоўнікаў ГУУС Мінгарвыканкама, усіх раённых упраўленняў унутраных спраў і іншых прадстаўнікоў сілавога блока прайшлі 29 лістапада на аэрадроме Ліпкі, паведаміла прэс-служба мінскай міліцыі.
“Напярэдадні выбарчай кампаніі 2024 года асаблівая ўвага надаецца тэарэтычным і практычным аспектам забеспячэння аховы грамадскага парадку ў няштатных сітуацыях, павышэнню ўзроўню гатоўнасці супрацоўнікаў да рэагавання на магчымыя пагрозы”, — адзначылі ў ГУУС.
За вучэннямі назіраў міністр унутраных спраў Іван Кубракоў.
У рамках вучэнняў начальнік ГУУС Міхаіл Грыб прыняў даклады “аб арганізацыі дзейнасці АУС і дзяржорганаў ва ўмовах ускладнення аператыўнай абстаноўкі, у тым ліку з праламленнем на будучую выбарчую кампанію”. Быў узгоднены “комплекс мер па забеспячэнні правапарадку і бяспекі грамадзян у няштатных сітуацыях, узнялі пытанні, якія патрабуюць дадатковай прапрацоўкі”.
“Спікеры далажылі аб маштабнай рабоце, якая актыўна праводзіцца для забеспячэння бяспекі грамадзян сёння і ўключае мерапрыемствы па рэагаванні на інфармацыйныя ўкідванні, спробы арганізацыі незаконных пікетаў, пагромаў, падпалаў і іншага дэструктыва. Для імгненнага прыняцця рашэнняў на базе мінскай міліцыі кругласутачна працягвае дзейнічаць аператыўна-сітуацыйны штаб”, — паведамілі ў міліцыі.
Вынікі нарады, паводле інфармацыі ГУУС, паказалі, “што ў горадзе дастаткова сіл і сродкаў для аператыўнага рэагавання на любыя правакацыі і спыненні іх на этапе задумы з нязменным прыцягненнем вінаватых да ўстаноўленай законам адказнасці”.
“Сталіца ў асаблівым рэжыме рыхтуецца да аховы грамадскага парадку пры падрыхтоўцы і правядзенні выбараў, каб кампанія прайшла на высокім узроўні”, — заявілі ў мінскай міліцыі.
У 2024 годзе ўпершыню ў Беларусі пройдуць аб’яднаныя выбары ў Палату прадстаўнікоў і мясцовыя саветы. Адзіны дзень галасавання прызначаны на 25 лютага. На працягу 60 дзён пасля яго адбудзецца першае паседжанне Ўсебеларускага народнага збору ў новым статуце.
Падчас выбараў будзе забаронена фатаграфаваць і выкладваць у інтэрнэт запоўнены бланк бюлетэня — як падчас датэрміновага галасавання, так і ў дзень выбараў. За парушэнне гэтага патрабавання пагражае адміністрацыйная адказнасць.
У 2020 годзе міліцыя брала актыўны ўдзел у разгоне масавых акцый пратэсту супраць фальсіфікацыі вынікаў прэзідэнцкіх выбараў.
З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.