Беларускі саюз мастакоў ліквідаваў суполку “Пагоня”

11 снежня, Позірк. Творчая суполка “Пагоня”, якая існавала ў межах Беларускага саюза мастакоў, ліквідаваная, паведаміла “Позірку” крыніца, знаёмая з сітуацыяй.

“Вядома, што гэтае рашэнне было прынятае па патрабаванню Міністэрства культуры”, — адзначыла крыніца.

Паводле неафіцыйнай інфармацыі, з саюза раней выключылі палітзняволенага Генадзя Драздова, які ўзначальваў суполку з 2011 па 2016 год.

Аб’яднанне было створана у 1990 годзе. Яго мэтамі называлася “развіццё нацыянальнага мастацтва, зберажэнне і памнажэнне мастацкіх набыткаў культурна-гістарычнай спадчыны дзеля абуджэння нацыянальнай самасвядомасці народа”.

У 2016 годзе, калі суполка адзначала 25 год існавання, паведамлялася, што ў яе шэрагах было больш за 50 мастакоў. Па ініцыятыве чыноўнікаў работы творцаў неаднаразова здымаліся з выстаў.

Мінгарсуд у траўні пакараў Драздова трыма гадамі пазбаўлення волі паводле ч. 1 арт. 342 (арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх) і ч. 1 арт. 361⁴ (садзейнічанне экстрэмісцкай дзейнасці) Крымінальнага кодэкса.