Лукашэнка абвінаваціў НАТО ў жаданні раз’яднаць, а потым нацкаваць адзін на аднаго краіны СНД

14 снежня, Позірк. Членам Садружнасці Незалежных Дзяржаў трэба “апярэдзіць апанентаў” і не дапусціць “рэалізацыі тых сцэнарыяў”, якія яны “спрабуюць навязаць”, заявіў Аляксандр Лукашэнка 14 снежня ў Мінску на сустрэчы з кіраўнікамі органаў бяспекі і выведвальных службаў краін СНД.

“Як мне дакладваюць (можа быць, у вас іншая інфармацыя), адна з асноўных задач выведсупольнасці НАТО і іх саюзнікаў — дэзінтэграцыя постсавецкай прасторы. Яны хочуць спачатку ўбіць клін у нашыя з вамі шматвяковыя добрасуседскія стасункі, а затым нацкаваць адзін на аднаго”, — цытуе Лукашэнку неафіцыйны тэлеграм-канал яго прэс-службы.

Паводле яго слоў, улады ў Мінску бачаць “актыўнасць замежных спецслужбаў” на беларускай тэрыторыі. “Формы іх працы набываюць усё больш агрэсіўны характар. Да нас закідваюць не проста шпіёнаў, а ўжо агентаў-тэрарыстаў”, — сцвярджае ён.

Лукашэнка заявіў, што “свет апускаецца ў хаос з непрадказальнымі наступствамі”, а “намацаць нават крохкую раўнавагу пакуль не ўдаецца”. На яго думку, “разбурана сістэма проціваг, збалансаваная раней узаемадапаўняльнымі дагаворамі, у тым ліку ў сферы ядзернага стрымлівання”.

“Абсалютна падтрымліваю пункт гледжання першага прэзідэнта Казахстана Нурсултана Назарбаева, які нядаўна сказаў, што як ніколі свет блізкі да ядзернай вайны. У такіх умовах узрастае роля спецыяльных службаў, найважнейшай задачай якіх з’яўляецца забеспячэнне абароны сваіх дзяржаў і грамадзян ад унутраных і знешніх пагроз”, — падкрэсліў Лукашэнка.

Варта адзначыць, што бяспека ў рэгіёне была парушана ў лютым 2022 года ў выніку поўнамаштабнага ўварвання Расіі ва Украіну, у якім афіцыйны Мінск падтрымаў Маскву.