Мінэканомікі: У кастрычніку — снежні магчыма некаторае павелічэнне тэмпаў росту цэн

16 кастрычніка, Позірк. Па асобных таварах у Беларусі адзначаецца рост цэн вышэй за ўстаноўленыя параметры, адзначыў у інтэрв’ю дзяржаўнаму выданню “Рэспубліка” намеснік міністра эканомікі Андрэй Картун.

Ён сцвярджае, што ў “большасці выпадкаў” гэта “запланаванае падвышэнне”.

“Так, напрыклад, сёлета значна даражэюць тытунёвыя вырабы. Прычына — падвышэнне акцызаў у рамках гарманізацыі падатковага заканадаўства з Расіяй”, — прыводзіць словы чыноўніка прэс-служба Мінэканомікі, якая перадрукавала інтэрв’ю.

Асноўнымі фактарамі ўмеранай дынамікі цэн, падкрэсліў Картун, выступаюць “прымаемыя меры як у рамках цэнавай палітыкі, так і эканамічнай падтрымкі вытворцаў”.

Дадатковым фактарам нізкай інфляцыі, адзначыў ён, з’яўляюцца “запаволенне росту цэн імпарту спажывецкіх тавараў, патанненне імпартуемых сыравіны і матэрыялаў, пераважна з Расіі”.

Намеснік кіраўніка Мінэканомікі прагназуе, што ў кастрычніку — снежні “магчыма некаторае павелічэнне штомесячных тэмпаў росту цэн з прычыны сезоннага аднаўлення цэн на гародніну і садавіну, планавага павелічэння акцызаў на тытунёвыя вырабы, а таксама пачатку ацяпляльнага сезона і пераносу на цэны, падвышаных раней тарыфаў на паслугі ЖКГ” .

Разам з тым чыноўнік не сумняваецца, што інфляцыя па выніках 2023 года “складзецца некалькі ніжэй мэтавых арыенціраў”.

Гадавая інфляцыя ў Беларусі з кастрычніка “паскорыцца ў сілу выхаду з разліку нізкіх паказчыкаў кастрычніка 2022-га”, гаварылася ў штотыднёвым макраэканамічным аглядзе Еўразійскага банка развіцця (ЕАБР) 16 кастрычніка.

Паводле даных Белстата, спажывецкія цэны ў верасні 2023 года выраслі на 0,7%. Харчовыя і нехарчовыя тавары падаражэлі на 0,7%. Кошт платных паслуг павялічыўся на 0,6%.

За студзень — верасень спажывецкія цэны выраслі на 3,6%: харчовыя тавары сталі даражэй на 2,9%, нехарчовыя — на 2%, платныя паслугі — на 7,1%.

За апошнія 12 месяцаў (верасень да верасня) цэны выраслі на 2% (жнівень да жніўня — на 2,3%, ліпень да ліпеня — на 2,7%; чэрвень да чэрвеня — на 2,9%). Харчовыя тавары падаражэлі на 2,4% (+3,4%; +3,9; +3,6%), нехарчовыя тавары патаннелі на 2,3% (-2,6%; -0,2%; -0,2%), кошт паслуг вырас на 7,6% (+7,2%; +7,1; +6,9%).

Найважнейшыя параметры прагнозу сацыяльна-эканамічнага развіцця Беларусі на 2023 год прадугледжваюць інфляцыю на ўзроўні 7–8%. Урад разлічвае ўтрымаць рост цэн і тарыфаў у межах 6%.

Сёлета 10 сакавіка Аляксандр Лукашэнка загадаў ураду любымі спосабамі — “манетарнымі, рэгулятарнымі, адміністрацыйнымі” — “трымаць калідор” інфляцыі па выніках года “ў раёне 7%”.