Мінабароны хоча навучаць беларускіх міратворцаў у В’етнаме

20 снежня, Позірк. Беларусь “зацікаўленая ў прапрацоўцы пытання” навучання сваіх прадстаўнікоў на базе Цэнтра падрыхтоўкі Дэпартамента міратворчых аперацый (ДМА) В’етнама, паведаміла 20 снежня прэс-служба Міністэрства абароны.

Паводле інфармацыі ведамства, алгарытм “выбудоўвання супрацы ў сферы міратворчай дзейнасці” абмяркоўваўся на сустрэчы начальніка дэпартамента міжнароднага ваеннага супрацоўніцтва — памочніка міністра абароны Валерыя Равенкі з начальнікам ДМА Міністэрства нацыянальнай абароны В’етнама Фам Мань Тхангам.

Як сцвярджаецца, бакі “адзіныя ў меркаванні”, што “дзейнасць па падтрыманні міру і бяспекі адыгрывае важную ролю ў цяперашніх рэаліях міжнароднай абстаноўкі”.

8 снежня 2023 года ўрады Беларусі і В’етнама падпісалі пагадненне аб узаемнай адмене віз. Дыпламатычныя стасункі паміж краінамі ўсталяваныя 24 студзеня 1992-га.

Адзінае ў Беларусі воінскае падраздзяленне, якое афіцыйна называецца міратворчым, — міратворчая рота 103-й Віцебскай асобнай паветрана-дэсантнай брыгады. Уваходзіць у склад міратворчых сіл Арганізацыі Дагавора аб калектыўнай бяспецы.

У зоне ўзброеных канфліктаў беларускія міратворцы могуць назіраць за выкананнем умоў перамір’я або дамоўленасцей аб спыненні агню, раз’ядноўваць бакі супрацьстаяння, займацца размінаваннем, аказаннем меддапамогі насельніцтву ды інш.