22 снежня, Позірк. Дэпутаты Палаты прадстаўнікоў Нацыянальнага сходу 22 снежня прынялі ў другім чытанні папраўкі ў закон аб прэзідэнце Беларусі.
Прэс-служба ніжняй палаты парламента паведаміла, што дакумент неабходны для прывядзення норм закона у адпаведнасць з новай рэдакцыяй Канстытуцыі, прынятай на рэферэндуме 27 лютага 2022 года.
У Асноўным законе ўзмоцненыя патрабаванні да кандыдатаў на пасаду прэзідэнта. Мінімальны ўзрост падвышаны з 35 да 40 гадоў, неабходны перыяд сталага пражывання ў краіне перад выбарамі павялічаны з 10 да 20 гадоў. Акрамя таго, цяпер кандыдатам у прэзідэнты не можа быць чалавек, які мае або меў раней замежнае грамадзянства, від на жыхарства ў іншай краіне, іншы дакумент, які дае права на льготы і іншыя перавагі па-за межамі Беларусі.
Прыняты ў другім чытанні законапраект таксама ўдакладняе прававы статус прэзідэнта, аптымізуе яго паўнамоцтвы, “у тым ліку па пытаннях аховы дзяржаўнага суверэнітэту, нацыянальнай бяспекі і тэрытарыяльнай цэласнасці” Беларусі, забеспячэння дзейнасці “вышэйшых судовых органаў і Цэнтральнай выбарчай камісіі”, звароты ў Канстытуцыйны суд.
Паводле даных праваабаронцаў, канстытуцыйны рэферэндум 2022 года прайшоў з парушэннямі.
Шэраг аналітыкаў адзначаў, што змены Асноўнага закона выключаюць з ліку прэтэндэнтаў на пасаду прэзідэнта не толькі грамадзян, якія пакінулі краіну і атрымалі ВНЖ, што дазваляе законна знаходзіцца на тэрыторыі замежнай дзяржавы, але і ўладальнікаў “карты паляка”.
11 ліпеня 2023 года ўступілі ў сілу змены ў закон аб грамадзянстве, якія сярод іншага абавязваюць грамадзян на працягу трох месяцаў пасля атрымання замежнага грамадзянства, ВНЖ, іншых дакументаў, якія даюць дадатковыя правы на тэрыторыі іншых краін (напрыклад, “карты паляка”), паведамляць пра гэтым кампетэнтным органам Беларусі.
