Птушкафабрыка “Дружба” аштрафаваная за парушэнне цэнавага заканадаўства
3 студзеня, Позірк. Міністэрства антыманапольнага рэгулявання і гандлю (МАРГ) 3 студзеня паведаміла аб выяўленым пад пазапланавай праверкі парушэнні ААТ “Птушкафабрыка “Дружба” (Баранавічы, Брэсцкая вобласць)” парадку фарміравання і прымянення цэн, якое выказалася ў рэалізацыі тавараў, адносна якіх ажыццяўляецца дзяржаўнае рэгуляванне цэн, без эканамічных разлікаў, якія пацвярджаюць узровень адпускных цэн”.
У прыватнасці, паводле інфармацыі МАРГ, з красавіка па кастрычнік 2022 года “таварыства асобным арганізацыям рэалізавала прадукцыю на суму 31,6 млн руб. з прадастаўленнем зніжак, памер і ўмовы прадастаўлення якіх ім не былі ўстаноўлены”.
Паведамляецца, што за дапушчанае парушэнне Эканамічным судом Брэсцкай вобласці ААТ “Птушкафабрыка “Дружба” прыцягнута да адміністрацыйнай адказнасці з накладаннем штрафу”.
Памер штрафу не ўдакладняецца, аднак МАРГ звяртае ўвагу, што “ў адпаведнасці з часткай трэцяй арт. 13.2 КаАП рэалізацыя тавараў (работ, паслуг), у адносінах да якіх ажыццяўляецца дзяржаўнае рэгуляванне цэн (тарыфаў), без эканамічных разлікаў, якія пацвярджаюць узровень адпускных цэн (тарыфаў), цягне накладанне штрафу на індывідуальнага прадпрымальніка або юрыдычную асобу ў памеры да 10% кошту рэалізаваных тавараў (работ, паслуг)”.
12 кастрычніка 2022 года стала вядома аб узбуджэнні Баранавіцкай міжраённай пракуратурай крымінальнай справы ў дачыненні да кіраўніцтва птушкафабрыкі “Дружба” за павышэнне цэн на дадаткова разробленую прадукцыю.
Генпракуратура тады адзначала, што службовыя асобы прадпрыемства, “дакладна ведаючы аб забароне штомесячнага павышэння звыш 1,2% цаны на сацыяльна-значны тавар”, далі работнікам указанні дадаткова перапрацаваць тушкі куранят-бройлераў, каб атрымаць новы даражэйшы тавар.
Паводле сцвярджэння пракуратуры, кураня дзялілася на дзве часткі “без істотных выдаткаў”, а кошт новага віду тавару павялічвалася без уліку ўведзеных абмежаванняў.
Дзеянні кіраўніцтва былі кваліфікаваны паводле ч. 2 арт. 426 КК (перавышэнне службовых паўнамоцтваў, учыненае з карыслівай і іншай асабістай зацікаўленасці).
