Лукашэнка зацвердзіў дзяржаўны знак якасці, які моцна нагадвае савецкі
19 студзеня, Позірк. Аляксандр Лукашэнка зацвердзіў дзяржаўны знак якасці, паведаміў неафіцыйны тэлеграм-канал яго прэс-службы “Пул першага”.
Адзначаецца, што знак уяўляе сабой “пяцікутнік чырвонага колеру, у цэнтры якога размешчана стылізаваная выява перавернутай літары “К” і надпіс “Беларусь”. “Пяць кутоў знака сімвалізуюць якасць беларускай прадукцыі, якая дасягаецца спалучэннем пяці паказчыкаў вытворчасці: бяспекі, экалагічнасці, інавацыйнасці, тэхналагічнасці і эстэтычнасці”, — гаворыцца ў паведамленні.
Заяўляецца, што парадак прысваення дзяржаўнага знака якасці і пералік стымулюючых ільгот і прэферэнцый, якія прадстаўляюцца вытворцам пры яго прысваенні, будзе вызначаны ўрадам.
17 лістапада 2023 года падчас рабочай паездкі ў Гомель Лукашэнка падтрымаў ідэю заснаваць у Беларусі адзіны дзяржаўны знак якасці. За аснову ён прапанаваў узяць знак якасці часоў СССР, які яму “вонкава падабаецца”.
27 лістапада ён падпісаў указ № 375 “Аб аб’яўленні 2024 года Годам якасці”. Паведамлялася, што ў рамках Года якасці будзе “зроблены акцэнт на павышэнні канкурэнтаздольнасці Беларусі праз беражлівае і прадуманае стаўленне да рэсурсаў, рэалізацыю высокатэхналагічных і энергаёмістых праектаў, прыярытэт якасных паказчыкаў над колькаснымі”.
5 студзеня на нарадзе аб асноўных напрамках работы па ўдасканаленні якасці ў 2024 годзе Лукашэнка пацвердзіў, што знак якасці СССР будзе ўзяты за аснову пры зацвярджэнні беларускага аналага. Яго прэс-служба адзначыла, што “знак будзе прысуджацца не прадпрыемству ў цэлым і нават не групе тавараў, а канкрэтнаму вырабу канкрэтнага вытворцы — аўтамабілю, тканіны і гэтак далей”.
Для ўзнагароджання знакам якасці будзе створана спецыяльная камісія. Чакаецца, што першыя лаўрэаты “з’явяцца ў канцы гэтага года”.
На працягу свайго кіравання Лукашэнка рэгулярна выказвае сімпатыі ў адрас СССР, заяўляючы аб карыснасці ўкаранення вопыту той эпохі ў незалежнай Беларусі. Па ініцыятыве Лукашэнкі на рэферэндуме 1995 года Беларусь фактычна вярнула герб і сцяг БССР. Таксама Беларусь з’яўляецца адной з трох былых савецкіх рэспублік, разам з Таджыкістанам і Узбекістанам, якія выкарыстоўваюць для сучаснага гімна музыку свайго савецкага гімна (са снежня 2000 года Расія выкарыстоўвае музыку гімна СССР). Пасля выбараў 2020 года і далейшага збліжэння з Расіяй “саветызацыя” Беларусі і яе ўладаў прыкметна паскорылася.
Дзяржаўны знак якасці СССР уяўляў сабой пяцікутнік са злёгку выпуклымі бакамі, які асацыяваўся з пяціканцовай зоркай (адным з геральдычных сімвалаў Савецкага Саюза). Пяць граняў (у цяперашняй беларускай версіі — пяць кутоў) тады асацыяваліся з надзейнасцю, даступнасцю, бяспекай, эстэтычнасцю і наватарствам. Такім чынам, беларускі знак якасці захаваў згадку бяспекі і эстэтычнасці, замяніў наватарства на інавацыйнасць, а надзейнасць і даступнасць змянілі тэхналагічнасць і экалагічнасць. У савецкім знаку якасці, як і ў беларускай, змяшчалася выява павернутай на 90 градусаў літары “К”.