BelPol: “Амкадор” заняўся распрацоўкай узбраенняў

28 студзеня, Позірк. Арганізацыя былых сілавікоў BelPol апублікавала расследаванне аб холдынгу “Амкадор”, у структуры якога існуе унітарнае прадпрыемства “Завод СВТ”, якое займаецца, паводле інфармацыі расследавальнікаў, распрацоўкай узбраенняў.

Для ўладальніка холдынгу бізнесмэна Аляксандра Шакуціна гэта свайго роду “прагін перад Лукашэнкам, які зможа казыраць гэтымі распрацоўкамі перад Пуціным”, заявіў у каментары “Позірку” прадстаўнік BelPol Уладзімір Жыгар.

Паводле інфармацыі BelPol, у адным з лістоў, адрасаваных Аляксандру Лукашэнку, Шакуцін паведаміў, што “Амкадор” у тым ліку займаецца “падтрыманнем абараназдольнасці краіны”.

“Калі мы ўбачылі гэтую інфармацыю, вельмі здзівіліся, пачалі шукаць, і праз некаторы час у нашым распараджэнні аказаўся ліст, у якім Шакуцін просіць Лукашэнку, дазволіць УП “Завод СВТ” (паводле інфармацыі расследнікаў, прадпрыемства займаецца распрацоўкай артылерыйскага радыёлакацыйнага комплексу (АРК) разведкі і абслугоўвання стральбы “Вартавы” і ўдарнага беспілотнага квадракоптара “Свіслач”. — “Позірк”.), правесці праз рэспубліканскае унітарнае прадпрыемства “Белтэлекам” закупкі неабходнага для “Завод СВТ” абсталявання, абыходзячы тэндэр”, — адзначыў Жыгар.

Таксама расследавальнікам удалося даведацца, што частка распрацоўкі, звязаная з вытворчасцю БПЛА “Свіслач”, “ажыццяўляецца па ініцыятыве “Амкадора”, а АРК распрацоўваецца паводле ўказання Мінабароны Беларусі сумесна з “упраўленнем ракетных войскаў і артылерыі Генштаба”.

На думку BelPol, “у сітуацыі, што склалася, Шакуцін выдатна разумее, якія для яго адкрываюцца перспектывы ў Расіі”. “Амкадор” бачыць прыклад іранскіх БПЛА “Шахед”, бо падобныя распрацоўкі зараз вельмі запатрабаваны для вайны ва Украіне, лічаць у арганізацыі.

“Гэта не толькі продажы ў РФ, але і наступнае сэрвіснае абслугоўванне, што дастаткова перспектыўна, калі ўхапіць кавалак гэтага крывавага пірага, бо РФ плаціць жывымі грашыма, гэта тое, што вельмі неабходна цяпер “Амкадору” для існавання”, — сказаў Жыгар.

Зыходзячы з дакументаў, якія ёсць у BelPol, “больш за палову камплектуючых закупляецца ў Кітаі”.

“Распрацоўка і выпрабаванне кантралюецца Мінабароны, куды ідуць рэгулярныя даклады. Паводле інфармацыі нашых крыніц у Беларусі, якасць гэтага БПЛА вельмі сярэдняя, але зрабіць 300-400 асобнікаў “Амкадор” можа лёгка, — паведаміў прадстаўнік BelPol. — Таксама быў дакумент, у якім параўноўваюць свой БПЛА і “Байрактар” па пунктах: у нечым лепш, у нечым — горш. Але яго кошт не павінен перавысіць 50 тыс. долараў. А гэта рэальныя грошы. “Амкадор” зацікаўлены прадаваць БПЛА ў комплексе з АРК. Сам па сабе БПЛА слабая сіла, але з прывязкай да артылерыйскага комплексу сістэму мона прадаваць і пакупнік — гэта Расія”.

Суразмоўца нагадаў, што ў лістападзе 2023 года BelPol рабіў сумесны даклад у парламенце Вялікабрытаніі, у якім гаворыцца, што беларускае прадпрыемства “Пеленг” купляе ў Злучаным Каралеўстве праз кітайскую кампанію Shenzhen 5G абсалютныя аптычныя энкодэры (датчыкі кутняга становішча, якія выдаюць інфармацыю аб становішчы ў становішчы , выкарыстоўваюцца ў робататэхніцы і прыладах навядзення для аптычнага і тэлекамунікацыйнага абсталявання. — “Позірк”.).

“Іх колькасць нашмат перавышае запатрабаванні Беларусі. Менавіта гэтая кампанія фігуруе пры абыходзе санкцый “Амкадорам”. Гэта “кампанія-пракладка”, зарэгістраваная ў Кітаі. Яе заснавальнікамі з’яўляюцца беларусы, і праз яе закупляюцца неабходныя камплектуючыя”, — удакладніў Жыгар.

З’яўленне Шакуціна і кіруючай кампаніі холдынгу “Амкадор” у санкцыйных спісах ЗША ад 5 снежня 2023 года, на яго думку, паказвае, што падобныя дзеянні “не прайшлі міма вялікіх гульцоў”.

“Шакуцін выдатна разумее, што яму неабходны грошы, таму што без чарговага крэдыту, субсідый і датацый яго прадпрыемства спыніць існаванне, а першы, за кім прыедзе чорны варонак – будзе ён сам, таму што Лукашэнку такое не даруе”, — падсумаваў расследавальнік.

ААТ “Амкадор” — беларуская машынабудаўнічая кампанія. Займаецца вытворчасцю і рэалізацыяй спецыяльных машын для дарожна-будаўнічай, лагістычнай, торфаздабыўной, камунальнай, лясной, сельскагаспадарчай галін.

Асноўны ўладальнік — набліжаны да Лукашэнкі Аляксандр Шакуцін, ён жа ўзначальвае савет дырэктараў. Па стане на 2022 год у структуру холдынгу “Амкадор” уваходзіла 26 прадпрыемстваў, у тым ліку 17 заводаў.