“Вясна”: Некаторыя затрыманыя падчас студзеньскага рэйду асуджаныя паводле артыкула КаАП, які раней не выкарыстоўваўся для рэпрэсій

2 лютага, Позірк. Некалькі чалавек, затрыманых падчас маштабнага рэйду сілавікоў 23–24 студзеня, асуджаныя паводле ч. 2 арт. 24.15 КаАП — “выкарыстанне замежнай бязвыплатнай дапамогі для ажыццяўлення тэрарыстычнай і іншай экстрэмісцкай дзейнасці ці іншых дзеянняў, забароненых заканадаўствам”, паведамляе праваабарончы цэнтр “Вясна”.

Праваабаронцы звяртаюць увагу, што раней гэты артыкул для палітычных рэпрэсій не выкарыстоўваўся.

“Гэта адвольны пераслед людзей, якія не парушылі ніякіх юрыдычных правілаў, а менавіта [не мелі] незаконнай мэты расходавання сродкаў падтрымкі для “ажыццяўлення тэрарыстычнай і іншай экстрэмісцкай дзейнасці ці іншых дзеянняў, забароненых заканадаўствам”. У дадзеным выпадку гэта з’яўляецца перадумовай для пераследу”, — заявіў праваабаронца Павел Сапелка.

Паводле яго слоў, палітыка Беларусі ў галіне рэгулявання замежнай і міжнароднай дапамогі “неаднаразова была прадметам крытычнай ацэнкі праваабаронцаў і міжнародных арганізацый, паколькі яна замахвалася на многія неад’емныя правы і свабоды, напрыклад, на свабоду асацыяцый і свабоду меркаванняў і іх выказвання”.

Другая частка артыкула 24.15 КаАП цягне накладанне штрафу ў памеры ад 10 да 30 базавых велічынь з канфіскацыяй атрыманай дапамогі, для юрыдычных асоб — штраф да 100% ад атрыманай дапамогі з канфіскацыяй гэтай дапамогі.

23–24 студзеня па Беларусі пракацілася хваля ператрусаў і затрыманняў сваякоў палітычных зняволеных, былых палітвязняў і інш. Некаторыя з затрыманняў звязаныя з праектам харчовай дапамогі рэпрэсаваным INeedHelp, які 16 студзеня быў прызнаны “экстрэмісцкім фарміраваннем”.

Паводле інфармацыі “Вясны”, пад пераслед трапіла больш за 200 чалавек, некалькі дзясяткаў асудзілі па адміністрацыйных справах, на некаторых заведзеныя крымінальныя справы. Папярэдне людзям інкрымінаваныя арт. 361¹ (стварэнне экстрэмісцкага фарміравання або ўдзел у ім) і арт. 361⁴ (садзейнічанне экстрэмісцкай дзейнасці) КК.