Беларусь дамовілася з Турцыяй аб пастаўках торфу
5 лютага, Позірк. У Ізміры падпісаны мемарандум аб продажы Беларуссю ў Турцыю тарфяной прадукцыі, паведамляе Міністэрства энергетыкі.
Згодна з дакументам, аб’яднанне “Белпалівагаз” паставіць турэцкай кампаніі GLS Grup “кіпаваны сепарыраваны торф і пажыўны тарфяны грунт” для прымянення ў сельскай гаспадарцы.
У прыватнасці, беларуская прадукцыя будзе выкарыстана для вырошчвання кветак, агароднінных культур, саджанцаў дрэў і кустоў.
“Плануецца, што першыя партыі тарфяной прадукцыі з Беларусі будуць адгружаны заказчыку ў гэтым годзе”, — гаворыцца ў паведамленні ведамства.
28 кастрычніка 2022 года паведамлялася, што беларускія заводы “Глінка” і “Віцебскторф” акрэдытаваныя для паставак торфу ў Кітай.
У верасні таго ж года завод “Туршоўка” адправіў у КНР першы чыгуначны састаў з торфам. “Гэты састаў ужо дайшоў да Пекіна, разгружаны, прадукцыя накіраваная спажыўцам. Усяго нашы кітайскія партнёры плануюць закупіць шэсць эшалонаў з беларускім торфам”, — заяўляў тады намеснік генеральнага дырэктара аб’яднання “Белпалівагаз” Валерый Кавалёў.
1 снежня 2023 года дэмакратычны лідар Святлана Ціханоўская заявіла, што “беларускія балоты — далікатная экасістэма, якая мае патрэбу ў падтрымцы і аднаўленні, патрабуюць асаблівай увагі і важныя для паляпшэння экалагічнага дабрабыту ўсёй Еўропы”.
“Цяпер дыктатарскі рэжым працягвае асушваць балоты і павялічваць здабычу торфу, што толькі пагаршае стан беларускіх балот. Калі ў Беларусі з’явіцца дэмакратычны, кампетэнтны і падсправаздачны ўрад, ён павінен мець доступ да [міжнароднаа] фінансавання, каб рэагаваць на страты і шкоду”, — дадала яна.
