Мінская міліцыя правяла перад выбарамі вучэнні са спецтэхнікай і аўтамабілем, які палаў
15 лютага, Позірк. “Тактыка-спецыяльныя заняткі падраздзяленняў органаў унутраных спраў мінскага гарнізона па нясенні службы на выбарчых участках” праведзены 14 лютага.
“Асноўныя задачы мерапрыемства – павысіць узровень падрыхтоўкі і зладжанасці дзеянняў пры спыненні парушэнняў грамадскага парадку ў памяшканнях выбарчых участкаў і на прылеглых тэрыторыях”, — гаворыцца ў рэлізе МУС.
Міністр Іван Кубракоў азнаёміў старшыню Савета Рэспублікі Наталлю Качанаву і кіраўніка Мінгарвыканкама Уладзіміра Кухарава з узорамі тэхнікі, узбраення і экіпіроўкі супрацоўнікаў.
“Звяртайце ўвагу на паводзіны выбаршчыкаў і пры найменшых падазрэннях на магчымыя супрацьпраўныя дзеянні інфармуйце супрацоўнікаў міліцыі”, — заявіў Кубракоў, звяртаючыся да прысутных старшыняў участковых выбарчых камісій.
“Загадзя абагульнілі інфармацыю аб сітуацыях, якія ўзнікалі на выбарчых участках у Беларусі ў 2020 годзе, у іншых краінах, і сёння сумесна са старшынямі ўчастковых камісій адпрацавалі алгарытм дзеянняў пры іх узнікненні”, — сказаў ён.
Паводле слоў Кубракова, з 19 лютага асабовы склад органаў унутраных спраў будзе пераведзены на ўзмоцнены варыянт нясення службы: “Для гэтых мэт задзейнічаем больш за 10 тыс. чалавек”.
Супрацоўнікі, удакладніў ён, “возьмуць пад ахову выбарчыя ўчасткі”, “у прыграніччы — з удзелам спецыяльных падраздзяленняў унутраных войскаў, атрадаў міліцыі асаблівага прызначэння”.
“Гатовы рэагаваць на ўсе магчымыя правакацыі і ўжо робім гэта, выяўляючы і прыцягваючы да ўстаноўленай заканадаўствам адказнасці тых, хто спрабуе правакаваць, абражаць нашых грамадзян”, — заявіў Кубракоў.
Сярод адпрацаваных уступных на вучэннях — “з’яўленне дэбашыра, неапазнанага лятальнага апарата, выяўленне безгаспадарнай сумкі, набліжэнне да будынка чалавека са зброяй або натоўпу, які бесчынствуе, атрыманне інфармацыі аб тэракце, які рыхтуецца”.
Таксама кіраўнікам мясцовых органаў улады, акруговых выбарчых камісій і раённых упраўленняў унутраных спраў Мінска паказалі “відэафільм з прыкладамі масавых беспарадкаў у розных краінах”.
Мяркуючы па фота- і відэаматэрыялах, распаўсюджаных МУС, у вучэннях была задзейнічана спецтэхніка для разгону натоўпу, беспілотнікі, для стварэння абстаноўкі прыгналі аўтамабіль, які палаў.
На тэрыторыі імправізаванага выбарчага ўчастка міліцыянеры трэніраваліся затрымліваць людзей, якія здымаюць на мабільныя тэлефоны свае бюлетэні ў кабінках для галасавання.
У гэтым годзе ўпершыню ў Беларусі пройдуць аб’яднаныя выбары ў Палату прадстаўнікоў Нацыянальнага сходу (ПП НС) і мясцовыя саветы дэпутатаў. Адзіны дзень галасавання прызначаны на 25 лютага.
На 110 месцаў у ПП НС восьмага склікання прэтэндуе 265 кандыдатаў, на 12.512 месцаў у мясцовых саветах дэпутатаў — 18.802. Сярэдні конкурс — 2,4 і 1,5 чалавека на месца адпаведна. Усе кандыдаты з’яўляюцца прыхільнікамі рэжыму Аляксандра Лукашэнкі.
Электаральная кампанія праходзіць на фоне маштабных рэпрэсій і зачысткі палітычнага поля ад апазіцыі. З 1996 года незалежныя назіральнікі не прызналі ніводную выбарчую кампанію ў Беларусі транспарэнтнай і адпаведнай стандартам АБСЕ.
11 лютага намеснік міністра ўнутраных спраў — камандуючы ўнутранымі войскамі Мікалай Карпенкаў дапусціў удзел наймітаў расійскай прыватнай ваеннай кампаніі “Вагнер” у мерапрыемствах МУС у перыяд выбараў.
“Забеспячэнню бяспекі на ўчастках для галасавання ў перыяд правядзення выбараў” была ўдзелена “асаблівая ўвага” 13 лютага на службовай нарадзе з удзелам міністра па надзвычайных сітуацыях Вадзіма Сіняўскага. Кіраўнік ведамства “звярнуў увагу асабовага складу на гатоўнасць да дзеянняў у асаблівых умовах, аказання дапамогі МУС у спыненні парушэнняў правапарадку”.