Лельчыцкі райвыканкам: Рэжым контртэрарыстычнай аперацыі ўведзены ў сувязі з вучэннямі сілавых структур

15 лютага, Позірк. Увядзенне рэжыму контртэрарыстычнай аперацыі ў Лельчыцкім раёне (Гомельская вобласць) звязана з “вучэннямі сілавых структур”, паведаміў журналісту “Позірка“ супрацоўнік мясцовага райвыканкама.

Чыноўнік адзначыў, што ў выканкаме “аб мерапрыемстве ўчора яшчэ не ведалі”.

Паводле яго слоў, “вышэйстаячымі органамі” цяпер таксама праводзіцца праверка мясцовых сілавых структур.

“Праводзімыя вучэнні ніякім чынам не адбіліся на працы не задзейнічаных у іх супрацоўнікаў райвыканкама. У звычайным рэжыме працуюць школы, суды. Апавяшчэнне было неабходна, каб людзі ў выпадку гуку сірэны, напрыклад, разумелі, што яна вучэбная”, — сказаў чыноўнік.

Журналіст “Позірка“ звязалася з райвыканкамам ад імя мясцовай жыхаркі.

Пра тое, што ў Лельчыцкім раёне ўведзены рэжым контртэрарыстычнай аперацыі, паведаміў афіцыйны тэлеграм-канал мясцовага райвыканкама ў першай палове дня 15 лютага. Адзначалася, што рашэнне прынята абласным упраўленнем Камітэта дзяржбяспекі. Прычыны не называліся.

Жыхароў раёна прасілі захоўваць спакой і выконваць патрабаванні супрацоўнікаў КДБ.

Лельчыцкі раён мяжуе з Украінай.

Згодна з законам “Аб барацьбе з тэрарызмам”, у зоне правядзення контртэрарыстычнай аперацыі асобы, якія праводзяць паказаную аперацыю, маюць права: прымаць пры неабходнасці меры па часовым абмежаванні або забароне руху транспартных сродкаў і пешаходаў на вуліцах і дарогах, затрымліваць на тэрмін да трох гадзін грамадзян у выпадку несанкцыянаванага пранікнення або спробы пранікнення іх у зону правядзення аперацыі.

У сілавікоў таксама ёсць права ўваходзіць бесперашкодна ў любы час сутак у жыллё пры неабходнасці з пашкоджаннем замыкаючых прылад; абшукваць людзей пры спробе трапіць у зону аперацыі; выкарыстоўваць у службовых мэтах сродкі сувязі, якія належаць грамадзянам, дзяржаўным органам і іншым арганізацыям.

У зоне правядзення аперацыі дзейнасць работнікаў СМІ рэгулюецца кіраўніком аператыўнага штаба па кіраванні контртэрарыстычнай аперацыяй.