СМІ: Затрыманаму ў Сербіі беларускаму рэжысёру пагражае экстрадыцыя па запыце Мінска

19 лютага, Позірк. Апеляцыйны суд у Бялградзе завяршыў разгляд справы аб экстрадыцыі беларускага рэжысёра Андрэя Гнёта, паведамляе Deutsche Welle.

Адзначаецца, што рашэнне будзе вынесенае “цягам 20–30 дзён”.

Гнёт затрыманы 30 кастрычніка 2023 года ў Сербіі па лініі Інтэрпола па запыце Мінска. Яго абвінавачваюць паводле эканамічнага артыкула, аднак абарона рэжысёра лічыць пераслед палітычна матываваным. Мужчыну называюць адным з заснавальнікаў ініцыятывы “Свабоднае аб’яднанне спартсменаў SOS.by”, прызнанай у 2022 годзе “экстрэмісцкім фарміраваннем”.

Андрэй Гнёт — рэжысёр тэлерэкламы і музычных кліпаў, журналіст.

У траўні 2022 года выйграў конкурс Effie Awards Russia. У 2016-м Marketing.by паведамляў, што Гнёт з’яўляецца” адным з самых вядомых і запатрабаваных “беларускіх рэжысёраў, сярод яго кліентаў такія вядомыя беларускія брэнды, як МТС, Mark Formelle, “Бульбаш”, “Аліварыя”, “Спартак”, “Беллакт”, World Of Tanks і іншыя.