ГУВ Мінабароны Украіны: Калі Расія падзе, здабудзе сапраўдную волю і Беларусь
9 сакавіка, Позірк. “Калі абяскроўленая паразай агідная Расія падзе, здабудзе сапраўдную волю і Беларусь”, — гаворыцца ў апублікаванай 9 сакавіка заяве Галоўнага ўпраўлення выведкі (ГУВ) Міністэрства абароны Украіны да другой гадавіны стварэння беларускага палка імя Кастуся Каліноўскага.
Украінская вайсковая выведка мяркуе, што ў вольнай Беларусі полк стане “асновай новага войска — дасведчанай, загартаванай агнём слаўных бітваў, адданай сваёй дзяржаве”.
Адзначаецца, што беларускія добраахвотнікі змагаліся з расійскім агрэсарам “з першых дзён вялікай вайны”: “Абаранялі Кіеў, ваявалі за вызваленне Мікалаеўшчыны, Херсоншчыны, Харкаўшчыны, абаранялі Севераданецк, Лісічанск, Бахмут”.
“Баявыя пабрацімы былі і застаюцца побач з намі ў вызначальны для абодвух нашых народаў і будучыні ўсёй Еўропы час. Шануем імёны ваяроў палка, якія загінулі за годнасць і свабоду Украіны і Беларусі — Волата, Тэрора, Брэста, Сябра, Атама, Літвіна і дзясяткаў іншых храбрацоў, якія вярнуліся з бою на шчыце. Гонар і тым, хто зараз знаходзіцца на вастрыі пяра гісторыі, — усім, хто змагаецца за свабодную, шчаслівую будучыню для сваіх сем’яў, сваёй нацыі і дзяржавы”, — гаворыцца ў заяве.
Раней ПКК апублікаваў справаздачу па выніках двух гадоў існавання вайсковай адзінкі. У ёй гаворыцца, што ў баявую частку палка “ўваходзяць батальён “Волат”, батальён “Літвін”, [падраздзяленне] БПЛА імя Мікіты Крыўцова, медычная рота, механізаванае падраздзяленне”, у 2023 годзе сфармавана “падраздзяленне імя Касцюшкі”, якое складаецца з замежнікаў, у асноўным “жыхароў Еўрапейскага саюза і ЗША, што прайшлі службу ў прафесійных узброеных сілах і маюць вялікі ваенны досвед”. Акрамя таго, ПКК “аб’яднаўся з беларускімі кіберпартызанамі”, якія займаюцца “праверкай навабранцаў, аховай і падтрымкай лічбавай інфраструктуры палка”.
Са справаздачы вынікае, што з пачатку паўнамаштабнай вайны Расіі супраць Украіны загінула 19 ваяроў ПКК, сярод якіх Ілля Хрэнаў, Зміцер Апанасовіч, Павел Суслаў, Іван Марчук, Васіль Грудавік, Васіль Парфянкоў, Вадзім Шатроў, Міраслаў Лазоўскі (імёны іншых полк не называе наўмысна).
Ціханоўская: Полк Каліноўскага ўвасабляе смеласць і годнасць беларускага народа
9 сакавіка, Позірк. Полк імя Кастуся Каліноўскага, які змагаецца ва Украіне супраць расійскай агрэсіі, увасабляе смеласць і годнасць беларускага народа і даказвае, што "беларусы гатовыя дзейнічаць і нават ахвяраваць сабой, каб дамагчыся змен", адзначыла дэмакратычны лідар Святлана Ціханоўская 9 сакавіка — у …