У БДУ распрацавалі прапановы па павышэнні “прывабнасці айчыннай адукацыі”

11 сакавіка, Позірк. Прапановы па павышэнні “прывабнасці айчыннай адукацыі” распрацаваныя ў Беларускім дзяржаўным універсітэце, паведамляецца на сайце вядучай ВНУ краіны.

Адзначаецца, што 11 сакавіка з удзелам рэктара БДУ Андрэя Караля і вышэйшага педагагічнага складу адбыліся “аналіз і абмеркаванне” прапаноў.

“Цяперашняя дыскусія стала лагічным працягам экспертнага дыялогу па заяўленай тэме, які прайшоў у ВНУ ў канцы лютага і быў абумоўлены неабходнасцю аналізу ацэнак вышэйшай адукацыі, агучаных кіраўніком дзяржавы падчас сустрэчы з рэктарамі ВНУ”, — гаворыцца ў паведамленні.

Сярод іншага на нарадзе абмяркоўваліся пытанні “ўзаемадзеяння з заказчыкамі кадраў, замацавання маладых спецыялістаў на працоўных месцах, уцягвання моладзі ў навуку і фарміравання патрыятычных якасцяў у студэнтаў”.

Акрамя гэтага, падымаліся тэмы “маральна-валявых якасцяў і фізпадрыхтоўкі студэнтаў”.

“Актыўнае абмеркаванне выклікалі тэмы новых форм работы з моладдзю, уплыву на яе сучасных інфармацыйных тэхналогій, у прыватнасці штучнага інтэлекту <…>”, — адзначылі ў БДУ.

Паводле слоў рэктара, “агучаныя ідэі шмат у чым адлюстроўваюць наяўную практыку ў БДУ”, а прапановы “найбліжэйшым часам абагульняць, сістэматызуюць для ацэнкі перспектыўнасці іх укаранення ў кіраўніцкія працэсы”.

13 лютага на нарадзе з Рэспубліканскім саветам рэктараў Аляксандр Лукашэнка заявіў, што выкладчыкі “першыя адказваюць” за нацыянальную бяспеку і “нясуць адказнасць за захаванне суверэнітэту краіны”, пры гэтым у сістэме адукацыі дагэтуль працуюць людзі, “якія не падзяляюць <…> нашу палітыку, дзяржаўную ідэалогію”, у яе працаўладкоўваюцца “ўчорашнія хістальнікі рэжыму”.

Пералічваючы пяць галоўных, на яго думку, праблем, характэрных для сістэмы вышэйшай адукацыі, Лукашэнка зрабіў акцэнт на “патрыятызме і ідэалогіі”, падкрэсліўшы, што “адукацыя ніколі не была і не можа быць па-за палітыкай”, бо выкладчыкі не проста даюць прафесію, але і фарміруюць “светапогляд маладых людзей”.

Ён адзначыў, што “нізкая замацоўвальнасць на першым працоўным месцы, сыход з прафесіі” — гэта”недазваляльная раскоша для нашай дзяржавы”. “Калі ўлічыць, колькі дзяржава плаціць, то што гэта, калі не эканамічнае злачынства?” — сказаў Лукашэнка.

Ён мяркуе, што сярод праблем таксама “імкненне выпускнікоў атрымаць вышэйшую адукацыю за мяжой”, адкуль яны “могуць вярнуцца, але з цалкам перавернутай свядомасцю”.

На думку Лукашэнкі, моладзь не надта ахвотна ідзе ў навуку і выкладанне, што таксама з’яўляецца праблемай.

У 2020 годзе студэнты і выкладчыкі многіх беларускіх ВНУ падтрымалі масавыя пратэсты супраць фальсіфікацыі выбараў прэзідэнта. У выніку шэраг выкладчыкаў быў звольненыя або вымушаныя сысці самастойна, на іх аказваўся ціск. Студэнтаў, якія бралі ўдзел у акцыях пратэсту, з навучальных устаноў выключалі. Пасля падаўлення пратэстаў ва ўніверсітэтах пачалі прытрымлівацца палітыкі ідэалагізацыі адукацыі і пераследу іншадумства ў акадэмічнай сферы.

Згодна з апублікаванай у 2021 годзе справаздачай аб становішчы студэнцкай супольнасці, падрыхтаванай Асацыяцыяй беларускіх студэнтаў і грамадскім Балонскім камітэтам, студэнты і выкладчыкі падвяргаліся пераследам, а кіраўніцтва ўніверсітэтаў цесна супрацоўнічала з праваахоўнымі органамі для пошуку і пакарання непажаданых.

Больш за 165 студэнтаў было адлічана паводле палітычных матываў, больш за 80 выкладчыкаў пазбавіліся працы за сваю палітычную пазіцыю, сотні студэнтаў і выкладчыкаў знаходзяцца ў вымушанай эміграцыі і не могуць вярнуцца дадому.

Студэнты падвяргаліся крымінальнаму пераследу. Сярод самых гучных працэсаў — “справа студэнтаў”, у рамках якой 12 чалавек былі прыгавораныя да пазбаўлення волі на тэрмін ад двух да двух з паловай гадоў. Усе яны прызнаныя палітычнымі зняволенымі, адбылі свой тэрмін і выйшлі на волю.