МУС паведаміла аб затрыманні чарговага кур’ера тэлефонных махляроў
13 сакавіка, Позірк. Супрацоўнікамі крымінальнага вышуку Цэнтральнага РУУС Мінска затрыманы 20-гадовы хлопец за дапамогу тэлефонным аферыстам, паведамляе прэс-служба МУС.
“Фігурант расказаў, што ў мэсэнджэры пазнаёміўся з дзяўчынай. Новая знаёмая прапанавала яму хуткі заробак: забіраць у кур’ераў службы дастаўкі пакеты з рэчамі і грашыма, якія перадавалі нібыта за выратаванне блізкіх ашуканыя пенсіянеры. Сышчыкі ўстанавілі, што ўсяго затрыманы такім чынам забраў звыш 200 тыс. рублёў”, — гаворыцца ў рэлізе.
Распачата крымінальная справа за махлярства.
Ведамства нагадала, што “кур’еры і іншыя памагатыя тэлефонных аферыстаў нясуць крымінальную адказнасць нароўні з арганізатарамі злачынстваў”.
За студзень — люты 2024 года ў Беларусі затрыманы 42 кур’еры тэлефонных ашуканцаў, паведаміў 9 сакавіка начальнік аддзела галоўнага ўпраўлення крымінальнага вышуку МУС Васіль Шупляк.
Паводле даных на той дзень, з пачатку года было ўзбуджана 63 крымінальныя справы за тэлефоннае махлярства.
Пры гэтым 11 лютага прэс-служба МУС паведамляла, што з пачатку 2024 года ўзбуджана 19 крымінальных спраў па фактах тэлефоннага махлярства. Зламыснікам удавалася схіліць суразмоўцаў да перадачы буйных сум узамен на “непрыцягненне іх сваяка да адказнасці за нібыта ўчыненае ДТЗ”. Падобныя злачынствы зарэгістраваны па ўсёй краіне.
“У выніку супрацьпраўных дзеянняў грамадзянам нанесены ўрон, які перавышае 200 тыс. рублёў. Характэрна: у большасці выпадкаў для рэалізацыі сваіх задум ашуканцы выкарыстоўвалі кіроўцаў таксі, якія забіралі ў ашуканых людзей пасылкі з грашыма і дастаўлялі іх у паказанае месца”, — гаварылася ў рэлізе.
