На санаторый кіраўніцтва спраў Лукашэнкі ў Сочы пададзены пазоў — на працягу 12 гадоў ён не плаціў за электрычнасць

15 сакавіка, Позірк. 16 траўня ў Арбітражным судзе Краснадарскага краю будзе разгледжаны пазоў прадпрыемства “Сочыцяплоэнерга” да санаторыя Кіраўніцтва справамі Аляксандра Лукашэнкі “Беларусь”, размешчанага ў гэтым курортным расійскім горадзе, паведамляе ТАСС са спасылкай на сайт электроннага судаводства РФ.

Як сцвярджаецца, здраўніца завінавацілася з 2011 да 2023 года за электраэнэргію 129,4 тыс. расійскіх рублёў. Пеня за гэты час дасягнула 156,8 тыс. рублёў, такім чынам, агульная сума, якую “Сочыцяплоэнерга” мае намер спагнаць з санаторыя, складае 286,2 тыс. рублёў (каля 3,12 тыс. долараў).

Кампетэнтнай расійскай кампаніяй “Курорт экспертыза” 17 чэрвеня 2019 года санаторыю “Беларусь” прысвоены ўзровень “тры зоркі”. У здраўніцы сем нумароў катэгорыі “апартаменты”, 12 — “люкс”, 225 — “першая катэгорыя”.

Побач з санаторыем размешчаная сочынская рэзідэнцыя Лукашэнкі, дзе ён спыняецца падчас візітаў у паўднёвыя рэгіёны Расіі.