Забарона на ўвоз асобных тавараў з Літвы пачне дзейнічаць з 1 красавіка

16 сакавіка, Позірк. Забарона на ўвоз асобных тавараў з Літвы пачне дзейнічаць з 1 красавіка, вынікае з пастановы ўрада ад 14 сакавіка № 182 “Аб прымяненні спецыяльнай абмежавальнай меры”, якая апублікавана на Нацыянальным прававым інтэрнет-партале.

Як паведамлялася, забаронена перамяшчаць праз пункты пропуску на беларуска-літоўскай мяжы шэраг тавараў, прызначаных для продажу ў Беларусі, незалежна ад краіны іх паходжання. У гэты пералік увайшлі “вады, піва, віны, сусла вінаграднае, вермуты, іншыя напоі зброджаныя, спірт этылавы, воцат, шыны і покрыўкі пнеўматычныя гумовыя, адзенне і іншыя вырабы, якія былі ва ўжыванні, а таксама былыя ва ўжыванні часткі і прыналежнасці транспартных сродкаў. ”.

Анансавалася таксама забарона, якая тычыцца ўласна літоўскай прадукцыі: малака і вяршкоў згушчаных, садавіны і арэхаў, кавы, сокаў фруктовых, вод, воцату, калгот, панчох, гольфаў, шкарпэтак і іншых панчошна-шкарпэткавых вырабаў, асобных будаўнічых вырабаў, халадзільнікаў і маразільнікаў.

Пра яго ў гэтай пастанове нічога не гаворыцца.

Меры прыняты ў адказ на дзеянні ўрада Літвы, які з 1 сакавіка закрыў пагранічныя пераходы Лаварышкес (з беларускага боку Катлоўка) і Райгардас (Прывалка).

Забараніўшы ўвоз з Літвы шэрагу тавараў, беларускія ўлады “ўвялі санкцыі супраць саміх сябе і ўласнага народа”, заявіў інфармагенцтву BNS міністр замежных спраў гэтай балтыйскай дзяржавы Габрыэлюс Ландсбергіс.

На думку прэм’ер-міністра Рамана Галоўчанкі, страта літоўскай прадукцыі “абсалютна ніяк не адаб’ецца на нашай эканоміцы і спажывецкім рынку”.