У Польшчы праходзіць аўдыт ІТ-кампаній, якія працавалі з візавай праграмай PBH
18 сакавіка, Позірк. Польскае агенцтва інвестыцый і гандлю (PAIH) праводзіць унутраны аўдыт ІТ-кампаній, якія выкарыстоўвалі візавую праграму Poland Business Harbour (PBH) у 2020–2023 гадах, піша выданне Rzeczpospolita.
Грамадзянам Беларусі ў рамках PBH Польшча выдала 93 тыс. віз, паведамілі выданню ў МЗС краіны.
Пры гэтым з 2020 года ў Польшчу ўехала ўсяго каля 15 тыс. замежнікаў з візай PBH, якія прадстаўляюць розныя краіны, паведамілі ў Памежнай службе.
Летась польскую мяжу па візе PBH перасеклі 2.184 беларусы, 110 расіян, 12 грузінаў і 114 замежнікаў з іншых краін (у тым ліку Індыі, Ірана, Карэі, Японіі, Азербайджана), удакладняецца ў публікацыі.
PAIH звярнулася да 50 кампаній, якія перавезлі больш за ўсё ІТ-спецыялістаў, з просьбай падрыхтаваць справаздачу аб ліку супрацоўнікаў, якія атрымалі візы PBH, якія пераехалі ў Польшчу і звярнуліся за відам на жыхарства.
Атрыманыя ад 30 кампаній адказы паказваюць, што 13,6 тыс. супрацоўнікаў атрымалі візу PBH, у тым ліку 9,5 тыс. пераехалі ў Польшчу і 8,4 тыс. падалі заяву на атрыманне часовага віду на жыхарства. У гэтыя лічбы не ўваходзяць члены сем’яў, якія ацэньваюцца прыкладна ў 40%.
Пры гэтым у агенцтве не маюць інфармацыі, колькі чалавек падало дакументы на атрыманне візы, колькі заяў было станоўча разгледжана консуламі або колькі чалавек рэлакавалася ў цэлым па ёй.
Выданне звяртае ўвагу на “абуральную дыспрапорцыю паміж колькасцю выдадзеных віз і колькасцю тых, хто прыехаў у Польшчу”.
Да расследавання падключыліся адпаведная камісія Сейма і Цэнтральнае антыкарупцыйнае бюро краіны.
26 студзеня міністр замежных спраў Польшчы Радаслаў Сікорскі прыняў рашэнне прыпыніць удзел МЗС у PBH да прыняцця рашэнняў, якія гарантуюць “належную праверку кампаній і замежнікаў, якія з’яўляюцца яе ўдзельнікамі”.
Паводле ацэнкі міністэрства, праграма “не апраўдала ўскладзеных на яе надзей”. “Сярод іншага, у грамадскай прасторы выказваліся сумненні наконт выкарыстання віз, выдадзеных у рамках праграмы, у мэтах, якія не адпавядаюць яе прынцыпам”, — адзначыў МЗС.
Іншаземцы, якія прэтэндуюць на працу ў польскім ІТ-сектары, па-ранейшаму могуць падаваць заявы на атрыманне візы на агульных падставах і пры выкананні ўсіх патрабаванняў атрымаць дазвол на працу на тэрыторыі краіны.
Пры гэтым у МЗС заявілі, што пачнуць “працу па спрашчэнні візавых працэдур для прадстаўнікоў бізнес-сектара, асабліва ў галінах, найбольш запатрабаваных польскай эканомікай”.
Праграма Poland Business Harbour была створана ў верасні 2020 года з мэтай прыцягнення ў Польшчу ІТ-спецыялістаў і кампаній з Беларусі, а затым была пашырана на такія краіны, як Грузія, Расія, Украіна, Малдова і Арменія.