Сенат Польшчы заклікаў “дэмакратычны свет” прыняць меры па вызваленні Пачобута

19 сакавіка, Позірк. “Сенат Рэспублікі Польшча звяртаецца да Еўрапарламенту, парламентаў і ўрадаў краін дэмакратычнага свету з просьбай прыняць меры па вызваленні журналіста Анджэя Пачобута і ўсіх вязняў сумлення ў Беларусі”, — гаворыцца ў рэзалюцыі, прынятай верхняй палатай польскага парламента 20 сакавіка.

За рэзалюцыю, паведамляе інфармагенцтва РАР, прагаласавалі ўсе 82 сенатары, якія ўдзельнічалі ў пасяджэнні.

Сенат Польшчы “рашуча асуджае” затрыманне і наступны прысуд палітвязню Пачобуту, а таксама ўмовы, у якіх ён утрымліваецца, называючы іх “ганебным актам парушэння правоў чалавека і элементарных правоў нацыянальных меншасцяў”, і патрабуе яго “неадкладнага вызвалення.

У рэзалюцыі выказваецца “самая высокая ўдзячнасць” журналісту за яго дзейнасць і заяўляецца “поўная салідарнасць” з яго сям’ёй і ўсімі, хто змагаецца за вызваленне палітвязня.

Сенатары таксама асудзілі “ліквідацыю ў Беларусі польскіх школ, пераслед актывістаў Саюза палякаў Беларусі, апаганьванне і разбурэнне польскіх мемарыялаў”. “Лічым гэтыя дзеянні недружалюбнымі ў адносінах да Польшчы, якія парушаюць нормы міжнароднага права і двухбаковыя пагадненні паміж Польшчай і Беларуссю”, — адзначаецца ў рэзалюцыі.

Сенат звярнуўся да польскага ўрада з просьбай “узмацніць дзеянні па вызваленні Пачобута і ўсіх незаконна зняволеных у Беларусі”. “Персанальныя санкцыі з боку Польшчы і Еўрасаюзу супраць прадстаўнікоў рэжыму Лукашэнкі, якія ўдзельнічаюць у пераследзе, павінны быць прадоўжаныя і стаць больш жорсткімі“, — падкрэсліваецца ў дакуменце.

Як адзначыла маршал Сената Малгажата Кідава-Блоньска, рэзалюцыя будзе накіраваная ў верхнія палаты парламентаў па ўсёй Еўропе.

Анджэй Пачобут — журналіст, намеснік старшыні Саюза палякаў Беларусі. 8 лютага 2023 года Гродзенскі абласны суд прыгаварыў яго да васьмі гадоў пазбаўлення волі ў калоніі ўзмоцненага рэжыму.

Суддзя Дзмітрый Бубенчык прызнаў яго вінаватым паводле ч. 3 арт. 130 (здзяйсненне групай асоб наўмысных дзеянняў, накіраваных на распальванне варожасці і варажнечы) і ч. 3 арт. 361 (заклікі да мер абмежавальнага характару (санкцый), накіраваных на прычыненне шкоды нацыянальнай бяспецы) Крымінальнага кодэкса.

Суд над Пачобутам пачаўся 16 студзеня, у гэты ж дзень пасля хадайніцтва дзяржабвінаваўцы Бубенчык прыняў рашэнне правесці працэс у закрытым рэжыме.

Разгляд справы некалькі разоў пераносілі: спачатку пасяджэнне было прызначанае на 28 лістапада 2022 года, затым — на 9 студзеня 2023-га.

Пачобут быў затрыманы 25 сакавіка 2021 года ў Гродне. Ён адмовіўся пісаць прашэнне аб памілаванні на імя Лукашэнкі. Камітэт дзяржбяспекі ўнёс яго ў спіс “асоб, якія маюць дачыненне да тэрарыстычнай дзейнасці”.

Пасля вынясення палітычна матываванага прысуду журналісту 10 лютага 2023 года Польшча на нявызначаны тэрмін закрыла адзін з двух даступных для падарожнікаў пунктаў пропуску — Баброўнікі (з беларускага боку Бераставіца).

Гл. таксама:

Спікер сената Польшчы заклікала вызваліць палітвязня Анджэя Пачобута

Дуда: Выкарыстанне дыпламатыі для вызвалення польскіх палітвязняў у Беларусі абсалютна неэфектыўнае

МЗС Польшчы назваў вызваленне журналіста Пачобута прыярытэтам сваёй дзейнасці