Пасля новага тэракту ў Расіі беларускія сілавікі традыцыйна заявілі аб узмацненні мер бяспекі

23 сакавіка, Позірк. “У сувязі з падзеямі ў Падмаскоўі МУС Беларусі прыняты дадатковыя меры па забеспячэнні грамадскай бяспекі. У першую чаргу гаворка ідзе пра аб’екты транспарту і месцы масавага збору грамадзян”, — паведаміла ўвечары 22 сакавіка прэс-служба міліцэйскага ведамства.

Адзначаецца, што “па ўказанні міністра ўнутраных спраў Івана Кубракова рэалізуецца комплекс мерапрыемстваў, накіраваных на забеспячэнне бяспекі ў месцах масавага збору грамадзян”. “Вызначаны аб’екты, якія патрабуюць павышанай увагі. Павялічана шчыльнасць нарадаў, якія для забеспячэння эфектыўнасці ўзмоцнены байцамі АМАП. Супрацоўнікі дадаткова ўзброеныя аўтаматычнай зброяй”, — гаворыцца ў прэс-рэлізе.

“Асабовым складам органаў унутраных спраў і ўнутраных войскаў МУС” прымаюцца “дадатковыя меры па ахове грамадскага парадку не толькі ў месцах масавага збору грамадзян, але і ў прыгранічных раёнах”.

Аператыўная абстаноўка знаходзіцца пад кантролем, падкрэслівае МУС.

Паведамленне з’явілася пасля тэракту ў канцэртнай зале “Крокус Сіці Хол” у падмаскоўным Краснагорску. У зале, які змяшчае 7.300 гледачоў, сабраліся прыхільнікі гурта “Пікнік”. Дакладная колькасць пацярпелых пакуль невядомая, будынак ахапіў пажар.

Беларускія сілавікі традыцыйна абвяшчаюць аб увядзенні дадатковых мер бяспекі пасля буйных тэрактаў у Расіі, напрыклад у метрапалітэне. Пасля нападаў украінцаў на ваенныя і іншыя стратэгічныя аб’екты ў РФ падобныя меры не ўводзяцца.

Са спачуваннямі да расійскіх уладаў звярнуліся Аляксандр Лукашэнка і ягоныя чыноўнікі.

Кіраўнік Народнага антыкрызіснага ўпраўлення Павел Латушка заклікаў суайчыннікаў пазбягаць месцаў масавага збору людзей “у святле падзей, што адбываюцца ў Расеі, якім папярэднічала інфармацыя заходніх разведак аб тэрарыстычных актах, якія рыхтуюцца, а таксама прапагандысцкіх заяў Лукашэнкі перад ваеначальнікамі, прадстаўнікамі сілавога апарату аб правакацыях, якія нібыта рыхтуюцца”.