Урад Чачэнскай Рэспублікі Ічкерыя павіншаваў беларусаў з Днём Волі
26 сакавіка, Позірк. Урад непрызнанай Чачэнскай Рэспублікі Ічкерыя (ЧРІ) павіншаваў беларускі народ з Днём Волі, адпаведную заяву ад імя кіраўніка рэспублікі Ахмеда Закаева апублікавала інфармагенцтва “Чачэн-прэс”.
“Мы верым у перамогу беларускай дэмакратыі і перакананыя, што зусім хутка Дзень Волі будзе святкавацца ўсім беларускім народам у свабоднай дэмакратычнай Рэспубліцы Беларусь”, — гаворыцца ў віншаванні.
Урад ЧРІ адзначыў, што “цяперашняя сітуацыя ў Беларусі падобная з сітуацыяй у акупаванай Чачэнскай Рэспубліцы Ічкерыя”.
“Жорсткасць і гвалт, бяссудныя затрыманні і наступныя пакаранні смерцю над нашымі народамі здзяйсняюцца па волі і загадзе крамлёўскіх варвараў, але рукамі здраднікаў уласных народаў. Тыраніі і дыктатарам прыходзіць канец, а будучыню творыць народ”, — адзначаецца ў заяве.
“Чачэн-прэс” таксама паведаміла, што 24 сакавіка ў Брусэлі перад будынкам Еўрапарламента прайшоў мітынг у гонар Дня Волі, “разам з беларусамі ў мерапрыемствах узялі ўдзел прадстаўнікі Чачэнскай Рэспублікі Ічкерыя, якая ўжо трыццаць гадоў змагаецца за свабоду і незалежнасць супраць расійскіх акупантаў”.
У кастрычніку 2022 года Вярхоўная рада Украіны прызнала тэрыторыю Чачні часова акупаванай Расіяй і асудзіла “генацыд чачэнскага народа”. У тлумачальнай запісцы да дакумента гаворыцца, што Чачня “выйшла са складу Савецкага Саюза ў 1991 годзе і абвясціла незалежнасць пад назвай Ічкерыі, аднак Расія перашкаджала гэтаму, парушыўшы прынцып раўнапраўя і самавызначэння народаў, замацаваны ў Статуце ААН”.
Некалькі чачэнскіх добраахвотніцкіх падраздзяленняў цяпер ваююць на баку Украіны ў расійска-ўкраінскай вайне.
Кіраўнік Чачэнскай Рэспублікі (суб’ект у складзе РФ) Рамзан Кадыраў, які падтрымлівае ваенную агрэсію Расіі супраць Украіны, у 2022 годзе заклікаў чачэнцаў, якія ўдзельнічаюць у вайне ва Украіне, забіць Закаева. Ён таксама паабяцаў Закаеву, што не спыніць яго пераследваць.
Чачэнская Рэспубліка Ічкерыя — самаабвешчанае дзяржаўнае ўтварэнне, якое існавала пасля распаду СССР на частцы тэрыторыі былой Чачэна-Інгушскай АССР у складзе РСФСР. Абвясціла незалежнасць у ліпені 1991 года, першым прэзідэнтам стаў Джахар Дудаеў. Гэта прывяло да зацяжной вайны паміж урадам Расіі і паўстанцамі, якая прывяла да шматлікіх значным ахвярам і разбурэнняў, наступнаму росту напружанасці і ваенным канфліктам на ўсім Паўночным Каўказе.
У 1999 годзе пачалася Другая чачэнская вайна, да вясны 2000 года ЧРІ як дзяржава была дэ-факта ліквідаваная.
Чачэнская Рэспубліка Ічкерыя не была прызнаная ніводным законным урадам дзяржаў — членаў ААН, аднак прадстаўніцтвы Ічкерыі існавалі ў шэрагу постсавецкіх дзяржаў — Азербайджане, Літве, Эстоніі, Грузіі, а таксама Турцыі, Катары і яшчэ прыкладна дзесяці дзяржаў. Большасць прадстаўніцтваў былі зачыненыя ў пачатку 2000-х гадоў.
