СК наклаў арышт на маёмасць “аналітыкаў Ціханоўскай”
27 сакавіка, Позірк. Аб заканчэнні папярэдняга расследавання крымінальнай справы “ў дачыненні да 20 удзельнікаў экстрэмісцкага фарміравання “Аналітыкі Святланы Ціханоўскай”, паведаміў 27 сакавіка аддзел інфармацыі і сувязі з грамадскасцю Следчага камітэта.
У СК сцвярджае, што “такая структура, як і, зрэшты, усе астатнія злачынныя групоўкі збеглых радыкалаў, стваралася выключна з адной мэтай — захоп дзяржаўнай улады неканстытуцыйным шляхам”.
Следчымі галоўнага следчага ўпраўлення “праведзена скрупулёзнае вывучэнне дзейнасці прадстаўнікоў экстрэмісцкага фарміравання”.
“У залежнасці ад ролі кожнага ўдзельніка ў здзяйсненні злачынстваў”, ім прад’яўлены абвінавачанні паводле наступных артыкулаў КК Беларусі:
— ч. 6 арт. 16 і ч. 3 арт. 130 (дапамога ў наўмысных дзеяннях, накіраваных на ўзбуджэнне іншай сацыяльнай варожасці і варожасці па прыкмеце іншай сацыяльнай прыналежнасці, учыненых групай асоб);
— ч. 1 арт. 357 (змова, здзейсненая з мэтай захопу дзяржаўнай улады неканстытуцыйным шляхам);
— ч. 6 арт. 16 і ч. 3 арт. 361 (дапамаганне ў публічных закліках да захопу дзяржаўнай улады, здзяйснення іншых дзеянняў, накіраваных на прычыненне шкоды нацыянальнай бяспецы Рэспублікі Беларусь, закліках, звернутых да замежнай дзяржавы, замежнай і міжнароднай арганізацыі, здзейсніць дзеянні, накіраваныя на прычыненне шкоды нацыянальнай бяспецы Рэспублікі Беларусь, учыненых з выкарыстаннем сродкаў масавай інфармацыі і глабальнай камп’ютарнай сеткі Інтэрнэт);
— ч. 1 арт. 3611 (кіраўніцтва экстрэмісцкім фарміраваннем і структурным падраздзяленнем, якое ўваходзіць у яго);
— ч. 3 арт. 3611 (уваходжанне асобы ў склад экстрэмісцкага фарміравання ў мэтах учынення злачынства экстрэмісцкай накіраванасці (удзел у экстрэмісцкім фарміраванні)).
“З мэтай забеспячэння кампенсацыі прычыненай шкоды на маёмасць абвінавачаных, у тым ліку дарагія кватэры, дамы і зямельныя ўчасткі, накладзены арышт. Цяпер папярэдняе расследаванне скончана ў парадку спецыяльнай вытворчасці. Крымінальная справа перададзена Генеральнаму пракурору для накіравання ў суд”, — гаворыцца ў рэлізе.
25 студзеня Следчы камітэт паведаміў аб пачатку спецыяльнай вытворчасці ў дачыненні да “20 так званых аналітыкаў Ціханоўскай”.
Фігурантамі крымінальнай справы сталі дырэктар “Беларускай ініцыятывы” Chatham House Рыгор Астапеня, сацыёлаг Філіп Біканаў, старшы палітычны дарадца Ціханоўскай Аляксандр Дабравольскі, яе прэс-сакратар Ганна Красуліна, спецпрадстаўнік па пытаннях выбараў Аляксандр Шлык і дарадца па пытаннях дыпламатыі Дзяніс Кучынскі, аглядальнік “Радыё Свабода” Юрый Дракахруст, дырэктар інстытута “Палітычная сфера” Андрэй Казакевіч, даследчыца Вераніка Лапуцька, праграмны дырэктар Свабоднага Беларускага ўніверсітэта Аляксандр Лагвінец, журналістка Ганна Любакова, палітолаг Марыя Рогава, палітолаг, філосаф, былы акадэмічны дырэктар інстытута стратэгічных даследаванняў BISS Пётр Рудкоўскі.
Таксама ў спісе палітолаг Алеся Руднік, эксперт праекта SYMPA/BIPART Наталля Рабава, палітык Павел Усаў, навуковы супрацоўнік Manchester Metropolitan University і Вільнюскага ўніверсітэта палітолаг Таццяна Чуліцкая, палітолаг Кацярына Шмаціна, Яўген Крыжаноўскі (цёзка і аднафамілец вядомага беларускага).
Цынічнымі назваў прад’яўленыя абвінавачанні фігурант “справы аналітыкаў” Дзяніс Кучынскі ў каментары “Позірку” 25 студзеня. “Пераслед экспертаў за прафесійную дзейнасць абсалютна недапушчальна”, — заявіў ён.
Спецыяльная вытворчасць — вытворчасць па крымінальнай справе ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, які вядзе крымінальны працэс. Магчыма паводле 34 складаў злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.
Ціханоўская пра "справу аналітыкаў": Акрамя рэпрэсій, рэжым Лукашэнкі нічога не можа прапанаваць
25 студзеня, Позірк. Спецыяльная вытворчасць, пачатая Следчым камітэтам (СК) у дачыненні да "20 аналітыкаў", прадыктаваная жаданнем рэжыму Аляксандра Лукашэнкі "адпомсціць тым, хто цвяроза ацэньвае сітуацыю ў Беларусі", заявіла дэмакратычны лідар Святлана Ціханоўская. На яе думку, "кожны раз, калі хтосьці паказвае …