Распачата спецвытворчасць у дачыненні да палітычных актывістаў Саранчукова і Кіркевіча (дапоўнена)

29 сакавіка, Позірк. Распачата спецыяльная вытворчасць у дачыненні да выканаўцы абавязкаў старшыні Партыі БНФ Вадзіма Саранчукова і былога намесніка кіраўніка моладзевай арганізацыі “Малады Фронт” Аляксандра Кіркевіча.

Паводле інфармацыі профільнага тэлеграм-канала Следчага камітэта “Спецыяльная вытворчасць. Афіцыйна”, ім інкрымінуецца ч. 1 і ч. 2 арт. 361⁴ (садзейнічанне экстрэмісцкай дзейнасці; тое ж дзеянне, здзейсненае паўторна). Саранчукову і Кіркевічу, якія жывуць за мяжой, прапанавана з’явіцца ва ўпраўленне СК па Гродзенскай вобласці.

Вадзім Саранчукоў — грамадскі і палітычны дзеяч з Гродна. Раней займаў пасаду старшыні Гродзенскай гарадской арганізацыі Партыі БНФ, з красавіка 2022 г. в.а. старшыні партыі. Дзейны партыйны лідар Рыгор Кастусёў знаходзіцца ў зняволенні. Сама палітычная структура дэ-юрэ ліквідаваная.

Аляксандр Кіркевіч — журналіст, палітычны актывіст, экс-палітвязень. Быў асуджаны за ўдзел у пратэстах у Мінску пасля прэзідэнцкіх выбараў 19 снежня 2010 года, але пасля памілаваны на падставе ўказа Аляксандра Лукашэнкі.

Крымінальная спецвытворчасць узбуджалася ў агульнай складанасці ў дачыненні да 88 чалавек. Гэты механізм прымяняецца супраць абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымы па 34 складах злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый ды інш.