У сакавіку пераследавалі паводле палітычна матываваных крымінальных спраў цэлыя сем’і — “Вясна”

8 красавіка, Позірк. У сакавіку зафіксавана павелічэнне інтэнсіўнасці судовых разглядаў палітычна матываваных крымінальных спраў, вынікае са справаздачы праваабарончага цэнтра “Вясна”.

Паводле звестак праваабаронцаў, у сакавіку ў крымінальным парадку паводле такіх матываў маглі быць асуджаныя не менш за 165 чалавек (48 — жанчын, 117 — мужчын).

Працягваюцца масавыя суды за ўдзел у акцыях пратэсту ў 2020 годзе: мінімум 85 чалавек у мінулым месяцы былі асуджаныя паводле арт. 342 Крымінальнага кодэкса (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх). На момант публікацыі вядома пра 25 прысудаў.

Гомельская і Брэсцкая вобласці апынуліся ў лідарах па крымінальных судах: там судзілі 24 і 20 чалавек адпаведна. У Гродзенскай вобласці — 11 чалавек, Магілёўскай — 10 чалавек, Мінскай — 4, Віцебскай — 4, у Мінску — 92.

У сакавіку “адбыўся ўсплёск паведамленняў афіцыйных рэсурсаў Следчага камітэта аб тым, што ў дачыненні да эмігрантаў, вымушаных пакінуць Беларусь праз рызыку палітычнага пераследу, распачатыя справы ў рамках спецыяльнай вытворчасці”. Паводле шэрагу спраў прадстаўнікі сілавых органаў праводзілі ператрусы па месцы іх рэгістрацыі.

Адным з найбольш істотных рэпрэсіўных інструментаў з боку ўладаў з’яўляецца крымінальны пераслед па палітычных матывах цэлых сем’яў і груп сваякоў, падкрэслілі праваабаронцы.

У сакавіку, гаворыцца ў справаздачы, у судовым парадку паводле арт. 342 КК у Мінску пераследаваліся не менш за дзесяць сямей.

Другой адметнай асаблівасцю пераследу стаў разгляд судовай сістэмай крымінальных спраў паводле артыкула, які прадугледжвае адказнасць за “фінансаванне тэрарыстычнай дзейнасці”. У сакавіку праваабаронцы зафіксавалі не менш за шэсць такіх выпадкаў.

Праваабаронцам за месцяц стала вядома пра шэсць выпадкаў, калі супраць раней асуджаных беларусаў ужылі дадатковы крымінальны пераслед. У пераважнай большасці выпадкаў грамадзян судзілі па больш цяжкіх артыкулах, чым першы раз.

Паводле справаздачы, на канец сакавіка ў Беларусі ў месцах пазбаўлення волі знаходзіліся 1.402 палітзняволеныя, з іх 171 жанчына.

У сакавіку “Вясне” стала вядома пра не менш як 453 выпадкі рэпрэсій (судоў і затрыманняў), “звязаных з крымінальным і адміністрацыйным пераследам, у тым ліку не менш за 416 выпадкаў палітычна матываванага адміністрацыйнага разгляду ў судзе”. Суддзямі прызначана не менш за 82 адміністрацыйныя арышты, 86 штрафаў, адзін раз — грамадскія працы.