“Рэпарцёры без межаў” заклікалі краіны Еўропы павялічыць падтрымку беларускіх незалежных СМІ
9 красавіка, Позірк. Еўрапейскім краінам варта павялічыць падтрымку беларускім незалежным СМІ, якім, “нягледзячы на іх жывучасць, пагражае небяспека”, гаворыцца ў заяве міжнароднай арганізацыі “Рэпарцёры без межаў” (RSF).
“Беларускія журналісты, якія апынуліся ў выгнанні ў Еўропе, сутыкаюцца з эканамічнымі праблемамі. Гэта пагражае выжыванню іх СМІ <…>. Ратуючыся ад рэпрэсій рэжыму Аляксандра Лукашэнкі і дэманструючы ўзорную стойкасць, гэтыя рэпарцёры і іх медыя цяпер маюць патрэбу ў больш шырокай падтрымцы з боку краін, якія іх прымаюць”, — адзначаецца ў звароце.
Падкрэсліваецца, што “самая старая дыктатура Еўропы” пераследуе журналістаў “у поўную сілу” пасля падзей жніўня 2020 года, што прывяло да “гістарычнага зыходу апошніх нязгодных галасоў з Беларусі”.
“Нават працуючы ў выгнанні, незалежныя беларускія СМІ захоўваюць значную аўдыторыю ў Беларусі”, — канстатуе RSF, “аддаючы належнае жыццеўстойлівасці 69 беларускіх СМІ ў выгнанні, якія сталі аб’ектамі іх даследавання”.
“Працуючы ў іншых краінах, за кошт актыўнай карэспандэнцкай сеткі ў Беларусі, гэтыя СМІ сталі надаваць больш увагі журналісцкім расследаванням і асвятленню нацыянальных, а не рэгіянальных падзей”, — гаворыцца ў заяве.
Пры гэтым, як заяўляецца, “прапагандысцкая машына” Лукашэнкі ў 2023 годзе “атрымала 50 млн еўра” і “павінна стаць яшчэ мацнейшай пасля стварэння ў студзені 2024 года супольнага расійска-беларускага медыяхолдынга”.
Паводле даных “Рэпарцёраў без межаў”, эканамічная ўстойлівасць незалежных медыя больш чым на 90% залежыць ад донарскай падтрымкі, больш за 75% медыя “маюць цяжкасці з аплатай працы сваіх супрацоўнікаў”.
“Больш за палову (54%) адпраўляюць іх у неаплатныя адпачынкі, а 69% не могуць прапанаваць прэміі або псіхалагічную падтрымку сваім нешматлікім калектывам, у той час як многія журналісты перажываюць цяжкія душэўныя траўмы. Такая фінансавая неабароненасць робіць журналістыку менш прывабнай і абцяжарвае набор супрацоўнікаў, асабліва для кіруючых пасад”, — адзначае RSF.
“Рэпарцёры без межаў” звяртаюць увагу на ўзмацнелыя рэпрэсіі беларускіх уладаў супраць незалежных журналістаў: “Многія прафесіяналы былі вымушаныя адправіцца ў выгнанне, прычым найбольшая хваля эміграцыі была зафіксавана ў перыяд з лета 2020 года па лета 2021 года, у асноўным у Польшчу і Літву. Аднак гэта не гарантуе бяспеку журналістаў, якія часам сутыкаюцца з ціскам на іх сваякоў, якія застаюцца ў краіне, або санкцыямі праз іх супрацоўніцтва з незалежнымі СМІ, унесенымі ўладамі ў спіс “экстрэмісцкіх”.
Па выніках 2023 года Беларусь заняла 157 месца сярод 180 краін у сусветным індэксе свабоды прэсы RSF.
Паводле звестак Беларускай асацыяцыі журналістаў, у няволі ўтрымліваюцца 34 прадстаўнікі СМІ.
Са снежня 2023 года аб праблемах з фінансаваннем абвясціў шэраг беларускіх незалежных медыя — Reform.by, Kyky.org, тэлеканал “Белсат”, Plan B.
14 сакавіка аб прыпыненні працы паведаміла беларуская рэдакцыя польскай радыёстанцыі “Радыё Унэт”.
"Рэпарцёры без межаў": Беларусь увайшла ў тройку краін па колькасці журналістаў, якія знаходзяцца ў зняволенні
14 снежня, Позірк. У 2023 годзе Беларусь увайшла ў тройку краін па колькасці журналістаў, якія знаходзяцца ў зняволенні. Пра гэта сведчаць звесткі штогадовай справаздачы міжнароднай арганізацыі "Рэпарцёры без межаў". Усяго ў свеце па стане на 1 снежня 2023 года за …